Eksperti i Ballkanit Perëndimor dhe hulumtuesi i Universitetit Johns Hopkins, Edward Jospeph, ka thënë se nëse serbët nuk marrin pjesë në zgjedhjet e 23 prillit në katër komunat veriore dhe nëse do të ketë incidente atë ditë, atëherë të gjitha këto do t’i shërbejnë Beogradit zyrtar për propagandë.
Në një intervistë për Kosovapress, ai po ashtu ka shprehur kritika për presidentin e Serbisë, Aleksandar Vuçiq, për deklaratat e tij se nuk do të zbatojë në tërësi planin evropian, përfshirë edhe marrëveshjen për Aneksin të arritur në Ohër.
“Ai do të përfitonte më së shumti nëse mbahen zgjedhjet dhe ka incidente, por ne kemi KFOR-in, duhet të shikojmë nga KFOR-i për trajtimin e kësaj çështjeje, shpresojmë se ata do të merren me këtë, kjo është një mënyrë. Mënyra tjetër është se ai do të mund të përfitonte nëse mbahen zgjedhjet dhe pothuajse asnjë serb nuk voton. Pra, ai do të përfitonte, Beogradi do të përfitonte nga kjo. Ata do të thoshin shikoni, kjo është një farsë, ata nuk po e dëgjojnë popullin, populli nuk doli dhe nuk votoi. Kështu që liderët e Kosovës duhet të mendojnë për këtë, të mendojnë për pasojat e kësaj, dhe përfitimin e Beogradit nga një gjë e tillë, është gjë shumë e keqe”, tha Joseph.
Një prej pikave të Aneksit të Ohrit i dakorduar nga palët me ndërmjetësim të BE-së, është edhe mospengimi i palëve për anëtarësimet e tyre në organizata dhe njohje ndërkombëtare. E sipas Jospehit, Vuçiqi ka dhënë mesazh tejet negativ për dialogun kur pas marrëveshjes së 18 marsit në Ohër, tha se s’do ta lejojë kurrë anëtarësimin e Kosovës në organizata ndërkombëtare.
Ai priste diçka tjetër nga Vuçiqi.
“Fjalët e para të Aleksandër Vuçiqit pas takimit në Ohër, do të duhej të ishin ‘inkurajoj serbët e Kosovës që të kthehen në institucione dhe të marrin pjesë në zgjedhje’”, tha Jopseph.
Joseph i quan të papranueshme deklaratat e presidentit serb.
“Kështu që nuk mund të zgjedhësh, të zgjedhësh cilat dispozita të marrëveshjes do t'i zbatosh, ta zbatosh këtë obligim e jo atë obligim”, tha Joseph.
Në deklaratat e tij publike, Vuçiqi ka thënë vazhdimisht se asnjëherë s’do ta njohë Kosovën as de-fakto as de-jure dhe se s’do ta pranojë anëtarësimin e saj në organizata ndërkombëtare. Ai, po ashtu, ka thënë se ia ka bërë të qartë komunitetit ndërkombëtar se çka do të zbatojë Serbia e çka jo, megjithëse në aneks thuhet se asnjëra pikë nuk ka epërsi mbi tjetrën dhe se për BE-në zbatimi i plotë i planit është i obligueshëm.
© KOHA. Të gjitha të drejtat janë të rezervuara.
