Në fokus të këtij takimi do të jetë implementimi i obligimeve të marra nga kryeministri i Kosovës, Albin Kurti, e presidenti i Serbisë, Aleksandar Vuçiq, në kuadër të takimit të 18 marsit në Ohër të Maqedonisë së Veriut. “Na vjen mirë se dialogu tash po bëhet kaq i popullarizuar në rajon dhe gjithnjë e më shumë vende po ofrohen që të jenë mikpritës të tij. Por, le të shkojmë hap pas hapi së pari, sepse dialogu është i bazuar në Bruksel”, ka thënë zëdhënësi i BE-së, Peter Stano

Bashkimi Evropian ka konfirmuar se javën që vjen do të ketë vazhdim të takimeve në kuadër të dialogut mes Kosovës dhe Serbisë, me një takim të kryenegociatorëve Besnik Bislimi nga Kosova dhe Petar Petkoviq nga Serbia, ka konfirmuar të martën zëdhënësi i BE-së, Peter Stano.

Ai ka thënë se fokusi në këtë takim do të jetë tek implementimi i obligimeve që palët kanë marrë në takimin e fundit të liderëve në Ohër të Maqedonisë së Veriut. Ai u është referuar edhe disa propozimeve që ka dhënë kryeministri aktual në detyrë në Mal të Zi, Dritan Abazoviq, i cili kishte propozuar që takimi i radhës në nivel të lartë në mes të kryeministrit të Kosovës, Kurti, dhe presidentit të Serbisë, Vuçiq, të zhvillohet në territor të Malit të Zi.

“Na vjen mirë se dialogu tash po bëhet kaq i popullarizuar në rajon dhe gjithnjë e më shumë vende po ofrohen që të jenë mikpritës të tij. Por, le të shkojmë hap pas hapi së pari, sepse dialogu është i bazuar në Bruksel”, ka thënë Stano.

Ai ka thënë se është arritur një hap shumë i rëndësishëm në takimin e Ohrit, ku u pajtuan presidenti i Serbisë dhe kryeministri i Kosovës edhe me marrëveshjen e edhe me aneksin e implementimit.

Stano ka thënë se deri tash, në këto dhjetë ditë sa kanë kaluar prej takimit në Ohër, ka pasur disa zhvillime lidhur me dialogun në BE.

“Kemi pasur Këshillin e Ministrave të Punëve të Jashtme, ku përfaqësuesi i lartë Borrell i ka njoftuar ministrat me këtë takim. Pastaj ai ka informuar edhe partnerët e tjerë. Është diskutuar edhe në Këshillin Evropian, ku liderët e BE-së kanë miratuar këtë dhe kanë porositur të dyja palët se tash duhet të vazhdojnë me implementimin e shpejtë, në mirëbesim të obligimeve që kanë marrë mbi vete”, ka shtuar ai.

Stano po ashtu ka thënë edhe një herë se takimet në kuadër të dialogut do të vazhdojnë dhe se takimet në nivel të lartë do të publikohen atëherë kur BE-ja të konsiderojë se një gjë e tillë është e përshtatshme. Gjithsesi ka konfirmuar se për javën që vjen do të ketë takim në nivel të kryenegociatorëve.

Në BE kanë përsëritur edhe të martën se pa marrë parasysh deklaratat që i japin palët në opinionet e tyre të vlefshme, edhe pse nuk është nënshkruar ndonjë marrëveshje apo aneksi, ato gjithsesi konsiderohen si obligime për të dyja palët dhe presin që palët të mos bëjnë veprime për të ikur nga obligimet.