Serbia kërcënon me dërgim të ushtrisë, Osmani thotë se kjo s’do të ndodhë kurrë
Zyrtarët e lartë të Serbisë i janë kundërpërgjigjur shtimit të prezencës së Policisë së Kosovës në veri me kërcënimin se do ta dërgojnë ushtrinë në këtë pjesë. Kryeministrja e Serbisë, Ana Bërnabiq, ka thënë se në këto rrethana Serbia ka të drejtën bazuar në Rezolutën 1244, që të kthejë një numër të caktuar trupash në Kosovë. Por, presidentja Vjosa Osmani në reagimin e saj ka deklaruar se në territorin e Kosovës nuk do të ketë më kurrë policë dhe ushtarë të Serbisë. Kthimin e forcave ushtarake serbe e konsiderojnë të pamundur edhe njohësit e çështjeve të sigurisë
Shtimit të prezencës së Policisë në veri Serbia i është kundërpërgjigjur me kërcënimin se në Kosovë do ta kthejë ushtrinë e saj.
Kryeministrja e Serbisë, Ana Bërnabiq, ka thënë për mediat serbe se veprimet e homologut të saj, Albin Kurti, “gati sa e sollën gjendjen në prag të konfliktit të armatosur”.
“Në këto rrethana Serbia ka të drejtën dhe synimin, sipas Rezolutës 1244, të kthejë një numër të caktuar trupash në Kosovë”, ka deklaruar ajo.
Bërnabiqi ka thënë se gjatë ditës presidenti i Serbisë, Aleksandar Vuçiq, do të japë më shumë informacione lidhur me atë se si do të kërkohet kthimi i trupave në Kosovë në bazë të kësaj rezolute.
I menjëhershëm ka qenë reagimi i presidentes së Kosovës, Vjosa Osmani. Ajo ka thënë se në Kosovë nuk do të ketë kurrë më policë e ushtarë të Serbisë.
“Kërcënimi i hapur për agresion policor e ushtarak nga ana e Serbisë dëshmon se në atë shtet vazhdon mendësia hegjemoniste. Kjo duhet të refuzohet e kundërshtohet qartë nga e gjithë bota demokratike, e cila ia dha goditjen më të fuqishme kësaj mendësie pikërisht në vitin 1999”, ka thënë Osmani.
Njohësi i sigurisë, Nuredin Ibishi, ka thënë se kthimi i forcave ushtarake në Kosovë nuk mund të ndodhë dhe se, sipas tij, citimi i Rezolutës 1244 për ta arsyetuar këtë akt është e gjitha keqinterpretim.
“Po paralajmëron edhe mundësinë që duke keqinterpretuar edhe Rezolutën 1244, që kinse për dërgimin e forcave të sigurisë serbe në Kosovë, çka është totalisht anakrone dhe e pakuptimtë dhe fare nuk ka të bëjë me atë. Kosova ka ecur përpara prej Marrëveshjes së Kumanovës. Dihet fort mirë që nuk ka asnjë forcë serbe, pa marrë parasysh se a është policore apo ushtarake që tërhiqet, prandaj dhe nuk ka kthim prapa. Këto janë vetëm kërcënime të vazhdueshme që i bëhen Kosovës”, ka thënë Ibishi.
Një ditë më parë edhe shefi i Zyrës për Kosovën në Qeverinë e Serbisë, Petar Petkoviq, ka thënë se Serbia do të shqyrtojë dërgimin e 1.000 forcave të saja të sigurisë në Kosovë.
