Buxheti për arsim për vitin 2023 do të jetë për 9.7% më i lartë se ai i këtij viti, vlera e të cilit do të jetë mbi 82 milionë euro, ka bërë të ditur sot ministrja e Arsimit, Arbërie Nagavci gjatë raportimit para Komisionit për Arsim.
Duke folur për zëvendësimin e orëve të humbura në ditët e vikendit, Nagavci ka thënë se pjesëmarrja e nxënësve ishte e ulët në javët e para, por trendi ka nisur të ndryshojë.
“Vazhdon të mbetet sfidë puna dhe angazhimi për të kompensuar humbjet që janë bërë për nxënësit. Kalendari i miratuar nga Ministria së paku në dy të shtunat e para ka pasur vështirësi serioze në implementim. Gjendja po vjen duke u përmirësuar dhe pres që në ditët vijuese pjesëmarrja të jetë më e madhe”, tha Nagavci.
“Po rezulton me një dështim në mbajtjen e këtyre orëve të humbura. Ju e thatë se është një sfidë, por konsideroj se duhet të trajtohet dhe të rregullohet, pasi këto orë të humbura, meqenëse keni deklaruar se orët duhet të zëvendësohen për fëmijët, pasi janë ata që kanë pasur më së paku faj në gjithë këtë situatë. Duhet të krijohet një mundësi e realizimit dhe kompensimit të duhur dhe jo vetëm për të thënë se po zëvendësohen, ndërsa në realitet është duke ndodhur diçka tjetër”, tha deputetja e AAK-së, Albena Reshitaj.
Përplasje në këtë komision pati sa i përket verifikimi të titujve akademikë të profesorëve në arsimin e lartë dhe plagjiaturën.
“(Neni) Na fut në një situatë paradoksale me ç’rast detyrohemi të bëjmë vlerësim retroaktiv të dispozitës në relacion me thirrjet që janë bërë përpara këtij ligji. Këto standarde minimale, njëri prej tyre që është se profesori i asocuar duhet të ketë minimalisht dy punime prej thirrjes së fundit, ky nuk ka qenë standard më herët. Tash hipotetikisht një thirrje që është marrë në 2010 dhe i nënshtrohet këtij standardi automatikisht ka me ra, kam përshtypjen se mundet me u prish sistemi”, tha kryetari i Komisionit, Ardian Gola.
“Këto që sapo i the jam shumë kundër, kategorikisht kundër. Arsyeja është se një prej nevojave të domosdoshme të zhvillimit të prosperitetit kombëtar është zhvillimi i universitetit. Komponenti kryesor është internacionalizmi. Kjo do të thotë se punimet duhet të jenë të nivelit të standardit botëror dhe pikë. Kam pasur problem me kolegët, pasi ata donin të zvogëlonin nivelin e botimit, pasi ishte një revistë që pranohej më herët në Universitetin e Prishtinës... Pa punime ndërkombëtare nuk kemi universitet, pa universitet nuk kemi profesorë, po them universitet të nivelit ndërkombëtar”, tha Jahja Kokaj nga radhët e Vetëvendosjes.
“Jemi munduar ta bëjmë maksimumin sa i përket integritetit akademik dhe përmirësimit të performancës, si dhe rritjes së konkurrencës. Ndërkombëtarizimi mbetet një ndër synimet tona... Jemi të interesuar që të kemi një qasje që përdor kritere dhe parime për të gjithë. Në rastin konkret unë mendoj se është një numër që është drejtuar apo për të cilat është marrë vendim nga Universiteti i Prishtinës në këtë rast. Me sa di unë, kanë qenë shtatë raste të adresuara, dy prej tyre janë adresuar nga Këshilli i Etikës. Masat të cilat janë dhënë për mendimin tim kanë qenë joproporcionale në raport me evidentimet që janë bërë. Për këtë arsye si ministri jemi të vendosur që të trajtohen në mënyrë të njëjtë dhe me shumë profesionalizëm për të gjithë”, tha ministrja Nagavci.
Në komision ministres së Arsimit gjithashtu iu kërkua që të bëhet urgjentisht unifikimi i teksteve shkollore Kosovë-Shqipëri.
© KOHA. Të gjitha të drejtat janë të rezervuara.
