“Tension e emocion” në përplasje me izolimin

Pikturat që mbajnë vulën e vitit 2020 shprehin individualitetin emocional dhe personalitetin artistik të artistit bashkëkohor, që pandemia ia dha një mundësi për ta begatuar sfondin e tij krijues. Faton Kryeziu, nëpërmjet artit, nuk ndalet vetëm te reagimi statik. Ai hulumton. Mbi 40 pikturat e ekspozuara dëshmojnë se artisti aty ka zbrazur gjithë botën e tij artistike, që vjen e pasur sa i përket raportit me ngjyrën

Se për artistin Faton Kryeziu koha e izolimit ka si kundërpërgjigje inspirimin, dëshmohet në pikturat e ekspozitës së tij personale “Tension e emocion”. Këtë kapitull të punës e ka përmbledhur në 42 pikturat e vendosura në ambientet e një hoteli në periferi të kryeqytetit. Pikturat e ekspozuara dëshmojnë se artisti aty ka zbrazur gjithë botën e tij artistike, që vjen e pasur sa i përket raportit me ngjyrën. Pikturat që mbajnë vulën e vitit 2020 shprehin individualitetin emocional dhe personalitetin artistik të artistit bashkëkohor, që pandemia ia dha një mundësi për ta begatuar sfondin e tij krijues.

“Play F” është titulli i vendosur në disa prej pikturave të artistit, ku loja me ngjyra del më në pah. Me këtë ekspozitë ai ka përmbledhur edhe punën e tij krijuese, duke e dokumentuar në librin “Tension dhe emocion”, nga autorja Suzana Varvarcia, që u promovua po të mërkurën mbrëma. “Tension dhe emocion” vjen si ndërveprim në pikturat e Kryeziut, i cili vlerësohet si artist i tablove befasuese, që refuzon ta përsërisë vetveten. Për Kryeziun, çdo pëlhurë e re është një sfidë e re.

“Unë nuk jam artist që e bëj vetëm një temë dhe kërkoj brenda saj. Unë jam piktor për të cilin hulumtimi është shumë më i rëndësishëm sesa të qëndruarit në një vend të caktuar”, ka thënë Kryeziu për KOHËN para hapjes së ekspozitës.

Se piktori nga Prizreni është goxha produktiv brenda galerisë së tij, e dëshmon edhe imazhi i cili hap librin që përthekon punën e stilin e këtij artisti. Aty dëshmohet marrëdhënia e artistit që nuk shkëputet nga tablotë e tij. Marrëdhënia e tij me ngjyrat, penelat e furçat vetëm përforcohet përmes imazheve. Libri në 220 faqe përmbledh ciklet e ndryshme të piktorit dhe vjen si një album vizual i veprave të piktorit.

Autorja e librit, Suzana Vervarica, ka shpjeguar se libri është i përbërë nga shtatë kapituj, ku gjashtë prej tyre flasin për qëndrimin e estetikës në artin e Kryeziut dhe kapitulli i fundit përmban nënkapituj ku shpjegohen ciklet e pikturave të artistit.

“Fatoni është një artist ndërmjet traditës dhe modernes, impresionizmit dhe ekspresionizmit, dhe natyrisht të gjitha veprat e tij nisin nga realizmi i thellë, pasi ai është një artist që e njeh mirë realizmin, deri te përpunimi që ia bën ai objektit që është realist dhe kthehet në një objekt të impresionit”, ka shpjeguar kuratorja Vervarica, e cila e ka përcjellë punën e artistit kosovar për më shumë se një dekadë.

Në këtë libër, përvoja figurative abstrakte e Faton Kryeziut është vlerësuar se lidhet tërësisht me lojën e ngjyrave dhe angazhimin emocional mbi shikuesin. Artisti i cili e refuzon përsëritjen në pikturë ngërthen në pikturë tematikë me problematika sociale dhe më gjerë. Veprat e tij cilësohen si piktura figurative në pamje dhe ekspresive në emocion.

Piktori Sali Shkupolli ka vlerësuar se ekspozita në çdo vepër shpërfaq “frymën” e origjinalitetit krijues të Kryeziut.

“Te veprat e tij është karakteristikë se kompozicionin e ka shumë të veçantë dhe te kombinimi i ngjyrave ka një kontrast të ngjyrave që shkon në harmoni në pikturën e tij”, ka thënë Shkupolli teksa ka vizituar ekspozitën.