Janë katërmbëdhjetë interpretues të ndarë në çifte. Nën buçitjen e daulles, vajzat shamikuqe e djemtë plisbardhë hedhin hapat e bëjnë lëvizje kuptimplote.
Për një moment, çdo dyshe formon një qark me dyshen tjetër për t’u pasuar menjëherë nga rrathë të tjerë me katër kërcyes, transmeton KOHA.
Fillon prapë nga e para pa e humbur asnjëherë dinamikën. Është kërcimi i koreografuar asisoj që çdo lëvizje shpreh shpirtin tropojan të Malësisë së Gjakovës.
Me të, Shqipëria synon që të kandidojë edhe me një vlerë tjetër në thesarin e kulturës shpirtërore të botës.
Ministrja e Kulturës, Elva Margariti, ka thënë të premten se Këshilli Kombëtar i Trashëgimisë Kulturore jomateriale po e kandidon në UNESCO.
“Ritme marramendëse, energji shpërthyese, ngjyra… Ky është ‘Kcimi i bjeshkës me tupan i Tropojës’, pjesë e folklorit tonë koreografik, një nga perlat e trashëgimisë shpirtërore kombëtare shqiptare”, ka shkruar ministrja Margariti pranë videos njëminutëshe, me interpretimin e këtij kërcimi në qytetin e Bajram Currit.
“Këshilli Kombëtar i Trashëgimisë Kulturore Jomateriale vendosi të çojë punën përpara për ta kandiduar atë, si ‘Kryevepra të trashëgimisë shpirtërore të njerëzimit’, nën mbrojtjen e UNESCO-s.
“Kcimi i bjeshkës me tupan të Tropojës” është vetëm njëra nga vlerat e trashëgimisë jomateriale të kulturës shpirtërore, që do të kandidojë në Organizatën e Kombeve të Bashkuara për Arsim, Shkencë dhe Kulturë.
