Auschwitzi konservon 8 mijë palë këpucë të fëmijëve të vrarë

Muzeu shtetëror Auschwitz-Birkenau ka nisur punën e ruajtjes së 8 mijë këpucëve që u përkisnin fëmijëve përpara se të vriteshin në kampin nazist gjerman të vdekjes. Në total, rreth 110 mijë këpucë të viktimave mbeten në Aushvic. Shumë janë shtrembëruar dhe kanë filluar të kalben, megjithatë mbesin testamenti emocional i jetëve të marra brutalisht

Kampi i vdekjes Auschwitz-Birkenau në Poloni ishte një nga më famëkeqit, i ngritur nga Gjermania naziste gjatë Luftës së Dytë Botërore.

Kampet e vdekjes luajtën një rol të madh në gjenocidin nazist të më shumë se gjashtë milionë hebrenjve, rreth dy të tretave të popullsisë hebraike të Evropës, si dhe të mijërave nga pakicat e tjera.

Forcat gjermane vranë 1.1 milionë njerëz gjatë Luftës së Dytë Botërore në ish-kampin e përqendrimit dhe shfarosjes.

Shumica e viktimave ishin hebrenj të vrarë në përpjekjen e diktatorit, Adolf Hitler, për të shfarosur hebrenjtë e Evropës.

Sot ky vend është një memorial dhe muze i menaxhuar nga shteti polak, të cilit i ka rënë përgjegjësia për të ruajtur provat e vendit, ku mes viktimave ishin edhe polakët.

Sot në një laborator modern konservimi në terrenin e Auschwitzit, shefja e koleksioneve, Elżbieta Cajzer tregon një këpucë të vogël kafe të mbathur dikur nga një fëmijë i quajtur Věra Vohryzková.

Punëtorët në laboratorin e konservimit fshijnë pluhurin dhe papastërtinë nga këpucët, duke përdorur lecka të buta dhe lëvizje rrethore të kujdesshme në lëkurën e objekteve të brishta.

Këpucët më pas skanohen dhe fotografohen në një dhomë fqinje dhe katalogohen në një bazë të dhënash.

Puna e konservimit në muze është pjesë e një përpjekjeje dyvjeçare të nisur muajin e kaluar për të ruajtur 8 mijë palë këpucë fëmijësh.

Tetë dekada më vonë, disa dëshmi po zhduken nën presionin e kohës dhe turizmit masiv.

Këpucët e vogla janë veçanërisht rrëqethëse.

“Këpucët e fëmijëve janë objekti më emocionues për mua, sepse nuk ka tragjedi më të madhe se tragjedia e fëmijëve”, thotë Mirosław Maciaszczyk, një specialist konservimi nga laboratorët e konservimit të muzeut.

“Këpuca është një objekt i lidhur ngushtë me një person, me një fëmijë. Është një gjurmë, ndonjëherë është e vetmja gjurmë që ka mbetur nga fëmija”.

Muzeu është në gjendje të ruajë rreth 100 palë këpucë në javë dhe ka përpunuar 400 sosh që nga fillimi i projektit muajin e kaluar.

Por më shumë se 100 mijë palë këpucë të viktimave kanë mbetur, rreth 80 mijë prej tyre në grumbuj të mëdhenj të ekspozuar në një dhomë ku vizitorët i shohin çdo ditë.

Qëllimi nuk është t'i kthejë ato në gjendjen e tyre origjinale, por t'i afrohen sa më shumë gjendjes në kohën kur u gjetën në fund të luftës.

Përktheu: Forca Jashari