Fansat e filmit që ndihen të zhgënjyer pasi aktori i tyre i preferuar u hoq nga një film ndonëse është pjesë e trailerit të tij, mund ta padisë studion për reklama të rreme, ka vendosur një gjykatë amerikane.
Dy adhurues të filmit thonë se “Universal Pictures” i mashtroi duke i nxitur për ta marrë me qira filmin e 2019-ës "Dje", sepse në trailer shfaqej aktorja, Ana de Armas.
Peter Michael Rosza nga San Diego dhe Conor Woulfe nga Maryland thonë se ata shpenzuan mbi 3,99 dollarë secili për të parë komedinë e Richard Curtis në “Amazon Prime”.
Një padinë e ngritur në fillim të këtij viti pretendohet se fansat ishin nxitur të mendonin se ylli kuban i “No Time To Die” do të shfaqej dukshëm në film, raportoi The Guardian.
“Megjithatë, ata nuk morën asnjë pamje të Ana de Armas në film”, thuhet në padinë, të raportuar nga mediat amerikane të premten.
“Universal” i kishte kërkuar gjykatësit të qarkut të SHBA-së, Stephen Wilson, të hidhte poshtë ankesën por në vendimin e tij të enjtes, Wilson hodhi poshtë argumentin e studios, duke thënë se trailerat janë fjalim komercial dhe u nënshtrohen ligjeve rreth reklamave të ndershme.
“Në thelb, një trailer është një reklamë e krijuar për të shitur një film duke u ofruar konsumatorëve një pamje paraprake të filmit,” shkroi gjyqtari.
Padia po kërkon të paktën 5 milionë dollarë dëmshpërblim në emër të fansave të zhgënjyer.
Avokatët do të mblidhen sërish për çështjen më 3 prill.
