Shkrepja e një fotografie dhe shpërndarja e saj, si ajo me flamurin me yll si simbol të socializmit, nuk do shumë kohë që karvani i reagimeve të jetë i madh. Pa u marrë me kontekstin fare, reaguesit mbërrijnë deri në pikën sa pyesin se kah po shkon shteti shqiptar, si ka mundësi që të bëhet një “provokim” i tillë e madje kërkohet edhe shkarkimi i kryebashkiakut Erion Veliaj. Fotografia ku në ekranin e skenës së festivalit “Sunny Hill” në Tiranë shfaqet flamuri kombëtar me yll është komentuar gjatë gjithë ditës së hënë. Pos diskutimit në masë të gjerë, edhe drejtues politikë janë bërë pjesë e muhabetit virtual.
Veç pas disa orësh, kur është sqaruar situata, kanë pushuar akuzat. Por, siç rëndom ndodh në Ballkan, sidomos në Shqipëri, situata është përdorur fort për akuza e kundërakuza politike.
Satira me historinë
Në natën e tretë dhe finale në edicionit të parë të festivalit “Sunny Hill” ka interpretuar edhe “Asgjë sikur dielli”. Me vokalistin Alban Nimani bendi ka shëtitur nëpër krijimtarinë e tyre. Midis të tjerash në ekran është shfaqur edhe spoti parodik “Ku ka më mirë se me qenë shqiptar?”, realizim i vitit 2005. Në këtë parodi satira shkon deri në nivelin sa Bajram Curri pi “CocaCola”. Parodizohen figura e ngjarje të shumta historike dhe ironizohet se shqiptari është krenar me gjithçka. Në një moment, krejt në fillim shfaqet edhe flamuri i modifikuar me yll në kohën e socializmit. E shpërndarja e një fotografie të këtij momenti ia ka futur fitilin debatit. Reagimet me pyetjet se çfarë kërkon flamuri komunist në këtë festival e deri te akuzat se provokimi është i qëllimshëm kanë marrë dhënë. Njëjtë siç ka ndodhur në Prishtinë në fillim të muajit, kur një këngëtar kishte provuar të ngjitej në skenë për të kënduar dhe i njëjti ishte shoqëruar nga Policia. Më pas diskutimet përse nuk është lejuar të këndohen këngë patriotike ishin të shumta.
Akuzat politike
Por në Tiranë reagimi ishte pakrahasimisht më i madh. U përfshinë edhe udhëheqës politikë asi që në protesta mbledhin mijëra njerëz në qendër të kryeqytetit.
“Përdhosja e flamurit dhe himnit kombëtar mbrëmë me simbolin e diktaturës, yllin e kuq, nga Edi Rama, pinjolli i xhelatit që firmosi varjen në litar të poetit disident Havzi Nela më 10 gusht të vitit 1988”, ka shkruar në Facebook ish-kryeministri e ish-presidenti i Shqipërisë, Sali Berisha, aktualisht kryetar i Partisë Demokratike. Në këtë rast ka goditur kryeministrin aktual, Edi Rama, dhe të atin e tij, skulptorin Kristaq Rama, firma e të cilit gjendet në dokumentin ku aprovohet dënimi me vdekje për poetin Havzi Nela.
Por edhe pala tjetër, pushteti, ka reaguar njëjtë. Kryetari i Bashkisë së Tiranës, Erion Veliaj, ka sqaruar se bëhet fjalë për një këngë që “është satirë ndaj regjimit”. Por, nuk e ka lënë me kaq.
“Uroj të luftoni me të njëjtin zell sekretarin e PPSh në krye të PD dhe sigurimsin aleat”, ka shkruar Veliaj në rrjete sociale. Ka aluduar në Sali Berishën duke e quajtur si sekretar të ndonjë organizate të ish-Partisë së Punës dhe në ish-presidentin Ilir Meta, për të cilin Autoriteti për Informimin mbi Dokumentet e ish-Sigurimit të Shtetit në Shqipëri ka thënë se kishte qenë bashkëpunëtor i Sigurimit Shtetëror në kohën e komunizmit. Kjo deklaratë nga ky institucion kishte dalë më 27 korrik, dy ditë pasi Metës i kishte përfunduar mandati si president i Republikës.
Kërkesa për shkarkim
Flamuri ka ngjallur edhe reagimin e Unionit Mbarëkombëtar të Integrimit të të Burgosurve dhe të të Përndjekurve Politikë të Shqipërisë. Udhëheqësi i Unionit ka shprehur indinjatën e thellë ndaj veprimeve të “papërgjegjshme të kryebashkiakut të Tiranës, Erion Veliaj, i cili me papërgjegjshmërinë që e karakterizon, me ideologjinë staliniste që e frymëzon e ktheu festivalin ‘Sunny Hill’ në një kongres të rinisë komuniste të Helmesit të vitit 1944, duke njollosur identitetin e kombit, flamurin shqiptar”.
Ka përmendur një varg kampesh internimi, persekutime, revolta e shumë ngjarje të zeza të kalendarit shqiptar në kohën e komunizmit, ka shkuar edhe më tej.
“Kryeministër Edi Rama, në qoftë se Erion Veliaj nuk jep dorehqjen, ju si kryeministër i këtij vendi duhet ta shkarkoni menjëherë për prishje të ekuilibrave të shoqërisë shqiptare me simbolet e komunizmit. Nuk mund të ketë paqe pa të vërtetën”, ka thënë ai.
Deputeti Enkelejd Alibeaj ka thënë se shfaqja e simboleve të komunizmit nuk është diçka e rastësishme në një vend që ka vuajtur gjatë nën diktaturën e instaluar nga komunistët. “Herë pas here nostalgjikë dhe jo vetëm shfaqen me simbolet e diktaturës duke fyer kujtimin, vuajtjet dhe sakrificat e mijëra shqiptarëve”, ka thënë deputeti demokrat që deri para pak ditësh ka qenë shef i grupit parlamentar të PD-së.
“Shoqëria shqiptare ka nevojë për transparencë dhe seriozitet në trajtimin e një çështjeje që s'mund të jetë kurrsesi armë në duart e atyre që e përdorin për arsyet meskine të politikës së ditës”, ka shkruar ai në Facebook.
Ironia e vitit 2005
Reagimet kanë nisur të ndalen pasi vokalisti i “Asgjë sikur dielli”, Alban Nimani, ka bërë një sqarim në rrjete sociale. Ka thënë se videoklipi i këngës “Ku ka më mirë se me qenë shqiptar?" është publikuar në vitin 2005 dhe është “një parodi e stilit Monty Python, ku trajtohen ngjarjet dhe figurat historike nga antikiteti deri në ditët e sotme, në mënyrë surrealiste dhe ironike”.
“Shfaqja e flamurit kombëtar me yll, nuk ka të bëjë me glorifikimin e komunizmit, përkundrazi, në videoklip shembet komunizmi. Ne jemi shumë koshientë për persekutimet, krimet dhe vuajtjen që e ka shkaktuar komunizmi në Shqipëri, sepse edhe u përkasim familjeve të persekutuara”, ka bërë të ditur ai. Fotografia e shkrepur të dielën mbrëma ka bërë që diskutimi të marrë flakë më shumë sesa ndonjë debat për festivalin, emrat që solli në Tiranë, organizimin e nivelit botëror, apo leverdinë e kryeqytetit që të jetë nikoqir i një ngjarjeje të tillë.
© KOHA. Të gjitha të drejtat janë të rezervuara.
