Kulturë

“Balkan Bordello” i rikthehet gadishullit, të cilin e godet

Skenë nga “Balkan Bordello” me tekst të Jeton Nezirajt, nën regji të Blerta Rrustemi-Nezirajt, e dhënë premierë botërore më 4 nëntor të vitit të kaluar në teatrin “Oda” në Prishtinë
 

Serbia, Maqedonia e Veriut dhe Mali i Zi, janë stacionet e “Balkan Bordello” për muajin gusht. Shfaqja prek indin e temperamentit ballkanas, gjurmon morbiditetin e shpirtit njerëzor dhe nxjerr në pah “budallallëkun dhe naivitetin e një epoke, që po ndërtohet mbi themele të dhunës, mosdurimit e urrejtjes”

Shfaqja e cila e zhvesh gadishullin problematik i është kthyer rajonit. “Balkan Bordello” do të jetë në një turne rajonal prej fillimit të javës që vjen. Shfaqja, që është bashkëproduksion midis teatrit prestigjioz “La MaMa” në New York, “Qendrës Multimedia” në Prishtinë, “Atelje 212” në Beograd dhe “My Balkans” në (SHBA/Serbi) do të jepet katër herë në rajon.

Me 8 gusht, kasta do të luajë në “Nisville Jazz Teatar Festival” në Nish, më 10 gusht në “Ohrid Summer Festival” në Ohër, më 12 gusht në “KotorArt International Festival” në Kotor dhe më 13 gusht në “Wild Beauty Art Festival” në Zhablak.