(ArtNews) – Një turist britanik mund të përballet me dënimin me vdekje në Irak pasi akuzohet për kontrabandë me artefakte.
Jim Fitton, ish-gjeolog, mblodhi fragmente guri dhe copa qeramike të thyera si gjësende të thjeshta gjatë një turneu arkeologjik në Eridu, një qytet i lashtë sumerian në Irakun jugor. Ai u arrestua në aeroport me 20 mars, pasi iu kontrolluan bagazhet që i përkisnin grupit turistik. Një turist gjerman i cili ishte gjithashtu pjesë e turit u kap në aeroport.
Sipas ligjit irakian, eksporti i qëllimshëm ndërkombëtar i çdo materiali të përcaktuar si trashëgimi kulturore “dënohet me vdekje”.
Anëtarët e familjes së Fittonit, të cilët jetojnë në Malajzi, i kanë treguar BBC-së se fragmentet ishin “në ambient të hapur, të pambrojtur dhe pa sinjalistikë që paralajmëronte se nuk duhej tërhequr”. Udhëheqësit e turneut gjithashtu mblodhën copëza dhe inkurajuan turistët të bënin të njëjtën gjë, sipas familjes.
Familja tani po i bën kërkesë Qeverisë britanike që të ndërhyjë në gjyq, i cili do të fillojë më 7 maj. Avokati i Fittonit ka hartuar një propozim që çështja të mbyllet, ka treguar familja, megjithatë plani ka nevojë për miratimin e britanikëve dhe nga Zyra e Punëve të Jashtme do t'i paraqitet një institucioni gjyqësor të rangut të lartë në Irak.
Ministrja e Jashtme britanike, Amanda Milling, ka thënë në një deklaratë se i janë përgjigjur rastit të Fittonit.
“Ne e kuptojmë urgjencën e rastit dhe kemi ngritur tashmë shqetësimet tona te autoritetet irakiane në lidhje me vendosjen e mundshme të dënimit me vdekje në rastin e zotit Fitton dhe kundërshtimin tonë ndaj dënimit me vdekje në të gjitha rrethanat si çështje parimore”, shkruhet në deklaratë.
Qyteti Eridu ka të ngjarë të jetë themeluar rreth vitit 5400 para Krishtit në kënetat dikur të harlisura jugore të lumit Eufrat, të njohur në vend si Ahwar. Rajoni ujor u drenazhua kryesisht midis viteve 1950 dhe 1970 për bujqësi dhe shpime nafte. Ai u konsiderua qyteti i parë në botë nga sumerët dhe brenda mitologjisë sumere shërbeu si mbretëria tokësore e perëndive. Ai u pushtua midis mijëvjeçarit të 5-të dhe të 2-të dhe arriti kulmin e ndikimit të tij në mijëvjeçarin e 4-t.
Arkitektura e përgjithshme e Eridusë është një tumë e madhe e përbërë nga 18 shtresa vendbanimesh, tempuj me tulla, shtëpi dhe struktura të tjera të ndërtuara mbi rrënojat e banorëve të vjetër për afro 3000 vjet. Sot, shumica e turistëve vizitojnë tempujt e ruajtur mirë të Eridusë. Më i famshmi është ai i Enkit. Ahwar i Irakut jugor, i cili përfshin Eridunë dhe qytetet sumeriane Uruk dhe Ur, u shtua në Listën e Trashëgimisë Botërore në vitin 2016.
Gati 100 mijë veta kanë nënshkruar një peticion duke kërkuar lirimin e Fittonit. Në një deklaratë familja e tij e quajti përgjigjen ndaj fushatës “të pabesueshme” dhe falënderoi mbështetjen “nga kolegët e vjetër, miqtë e mirë, të afërmit dhe të huajt, të cilët nuk e kanë lejuar këtë situatë të kalojë pa u vënë re”.
Folegj: Jim Fitton, ish-gjeolog, mblodhi fragmente guri dhe copa qeramike të thyera si gjësende të thjeshta gjatë një turneu arkeologjik në Eridu, një qytet i lashtë sumerian në Irakun jugor. Ai u arrestua në aeroport më 20 mars, pasi iu kontrolluan bagazhet që i përkisnin grupit turistik. Sipas ligjit irakian, eksporti i qëllimshëm ndërkombëtar i çdo materiali të përcaktuar si trashëgimi kulturore “dënohet me vdekje”. Në fotografi një pjesë e qytetit Eridu
© KOHA. Të gjitha të drejtat janë të rezervuara.
