Kulturë

Sheshi qendror i kryeqytetit – skenë baleti për talentet e reja

Sheshi “Zahir Pajaziti” për rreth një orë e gjysmë u shndërrua në një “studio baleti” në ambient të hapur. Të rrethuar nga publiku rreth 50 fëmijë që ushtrojnë balet kanë interpretuar duke treguar shkathtësitë e tyre. Në çdo teknikë që ata performonin, tregonin talentin e tyre. Talente që nga mosha 4 e deri te 15-vjeçare e afruan publikun me gjallërinë e baletit.

Përtej mureve të studios “Angels” u bë i mundur edhe performimi në një vend të hapur, e që e mundësoi edhe vëzhgimin e drejtpërdrejtë të prindërve për fëmijët e tyre.

“Hit the Rock Jack”, “Jetë”, “Piroutte” ishin veç disa copëza të programit, të cilat ndërroheshin varësisht nga grupmoshat në skenë. Pjesa kulmuese ishte bashkëveprimi me publikun. Pas duartrokitjeve për balerinët e rinj, skena u përjetua për të parën herë edhe për ata që patën përvojën fillestare me baletin.

“Ka qenë më ndryshe, sepse më shumë hapësirë dhe më shumë njerëz”, ka thënë 8-vjeçari, i cili po merret me balet tash e një vit, Lorent Kadriaj. “Më së shumti më kanë pëlqyer kërcimet dhe ushtrimet”.

“Është hera e dytë që po mbajmë orë të hapur. Ka qenë mirë edhe në Lipjan, edhe në Prishtinë, por mua m’u duk që këtu ka publik më shumë dhe po vijnë edhe njerëz që nuk na njohin”, ka thënë Morea Gashi, e cila ka nisur të ushtrojë balet tash e pesë vjet.

Përveç promovimit të talenteve të reja, njëra nga arsyet e inicimit të këtij organizimi ka qenë edhe ndërlidhja e baletit me publikun.

“Baleti nuk mund t’i shfaqë të arriturat përnjëherë”, ka thënë drejtuesi i studio “Angels”, Sead Vuniqi. “Ideja e ‘open class’ është që të informohen edhe qytetarët për baletin, ushtrimet të cilat bëhen, çfarë ore e bëjnë gjatë tërë kohës”.

Theks të veçantë organizatorët u vënë prindërve, të cilët kishin rastin të shihnin edhe zhvillimin e fëmijëve të tyre në balet përmes performancave në hapësira publike.

“Arsyeja pse e kemi bërë në Lipjan është sepse themelimi i shkollës së baletit ‘Angels’ ka lindur atje. Pas dy-tre vjetësh jemi transferuar në Prishtinë për shkak të kërkesave të prindërve”, ka treguar Vuniqi.

“Veprat i kemi të ndara në dy lloj si përmbyllje, ‘Katër stinët’ e Vivaldit si një lloj koreografie që ende s’e kemi përfunduar, por jemi duke e ndërtuar”, ka treguar ai për programin e përzgjedhur, i cili më shumë është spontan.

Iniciativa është mirëpritur edhe nga prindërit. Krenare Shala, e cila kishte vajzën e saj 3-vjeçare si pjesë të ngjarjes, ka thënë të jetë nismë e qëlluar.

“Për mua ka qenë shumë e mirëpritur kur na kanë njoftuar mësimdhënësit, për të parë dhe mbajtur një klasë të hapur, ta ndiesh sikur në një shfaqje të vërtetë, ju ndihmon ta largoni frikën nga skena, nëse vazhdojnë do ta kenë më të lehtë ta përjetojnë edhe skenën e paraskenën”, ka thënë ajo. “Vajzës i ka shërbyer në aspekt pozitiv si në socializim, si për shokë e shoqe të reja edhe në mënyrë të lëvizjeve që i ka mësuar”, ka treguar ajo.