Sopranoja kosovare Flaka Goranci ka zbuluar detaje të reja në lidhje me projektin e saj ”Udhëtim nëpër krijimet e grave”, që pritet të promovohet me koncerte nëpër vende të ndryshme të botës. “Është me të vërtetë interpretim i një tingulli që unë nuk e kam dëgjuar më parë e as përjetuar, ku muzika klasike takohet me atë orientale dhe ndërton një urë në mes të këtyre dy botëve”, ka thënë violonçelistja Teodora Miteva. Ajo është veç një nga muzikantët e përfshirë në projekt

Që në pamjet e para të trailerit të projektit “Udhëtim nëpër krijimet e grave” tregohet se bëhet fjalë për një projekt madhor. Folësit që zbulojnë detajet tregojnë se sopranoja kosovare Flaka Goranci ka bërë bashkë muzikantë të njohur. Të njëjtët kanë zbuluar detaje për projektin duke e vlerësuar atë si të jashtëzakonshëm. Është konsideruar si urë lidhëse midis kulturave muzikore të ndryshme në botë. Dëshmi, siç thotë Goranci, se muzika kalon kufijtë dhe muzikantët marrin rolin e ambasadorit.

Është sopranoja, producentja dhe kompozitorja Flaka Goranci ajo që fillimisht tregon më shumë detaje për projektin.

“Ne kemi bërë bashkë Perëndimin dhe Lindjen, në një projekt që do të tregojë jo vetëm vlerat e muzikës, por edhe vlerat njerëzore. Është një projekt më shumë social, por në të njëjtën kohë edhe muzikor”, ka thënë ajo.

Fill pas saj është pianistja austriake Donka Angatscheva që tregon se gjatë gjithë karrierës së vet ka luajtur vepra të ndryshme, por ato që shpalosen brenda projektit janë me të veçantat.

“Në karrierën time si artiste unë kam luajtur shumë kompozime, mirëpo mënyra se si ne po e prezantojmë këtë projekt është shumë speciale dhe ideja është e jashtëzakonshme”, ka thënë ajo.

Ka theksuar se është shumë e lumtur që është përfshirë në këtë projekt. “Mendoj se gratë janë shumë të forta në shoqërinë tonë të sotme, janë të pranishme dhe kjo vazhdon edhe në art e muzikë”, ka thënë ajo.

Aty-këtu, traileri mundëson që të dëgjohen copëza nga kompozimet që janë bërë tok në këtë projekt. Të pashmangshme janë edhe mornicat në trup nga interpretimi i Gorancit. Në trailer dëgjohen veprat e Suad Bushnaq-it, Flaka Gorancit, Dima Orshos, Consuelo Velazquez-it dhe Miriam Makebas.

Projekti është i veçantë edhe për violonçelisten nga Bullgaria, Teodora Miteva, e cila në moshën 18-vjeçare bëri debutimin me orkestrën e vendlindjes së saj.

“Është më të vërtetë interpretim i një tingulli që unë nuk e kam dëgjuar më parë e as përjetuar, ku muzika klasike takohet me atë orientale dhe ndërton një urë në mes të këtyre dy botëve”, ka thënë ajo për projektin.

Ambienti shoqëror dhe puna e zellshme që është bërë i kanë lënë mbresa edhe dirigjentit Konstantinos Diminakis, që Orkestra Simfonike e Londrës e kishte përzgjedhur në mesin e 20 dirigjentëve me të talentuar.

“Gjithë këto ditë kam punuar me muzikantë të mrekullueshëm në një ambient shumë miqësor dhe jam i sigurt që produkti i tyre i fundit, CD-ja, do të jetë një dhuratë e mrekullueshme për botën e muzikës”, ka thënë ajo.

Fill pas tij, është Goranci ajo që potencon se të gjithë muzikantët janë edhe ambasadorë.

“Ne thyejmë kufijtë, kufijtë politikë, dhe veçanërisht në këtë projekt tregojmë që së bashku mund të bëjmë muzikë dhe jo vetëm muzikë, por muzikë të mrekullueshme”, ka thënë ajo.

Sipas saj, veprat e bëra bashkë në këtë projekt janë të mrekullueshme. “Të gjithë ne jemi shumë të lumtur që na është dhënë mundësia që të incizojmë në këtë vend të mrekullueshëm”, ka thënë ajo. Xhirimet janë bërë në “Bösendorfer Klaviermanufaktur” në Vjenë.

E producenti i incizimeve, Othmar Eichinger, ka thënë se ky produksion është veçanërisht interesant pasi që kompozimet janë bërë tërësisht nga gratë.

“Nga gra që vijnë nga e gjithë bota, jo vetëm nga Evropa, pra edhe nga kontinente të tjera dhe muzika e tyre është jashtëzakonisht e bukur dhe të prekë thellë në shpirt dhe e kam shijuar mundësinë për të bërë këtë incizim”, ka thënë ajo.

“Udhëtim nëpër krijimet e grave” pritet të marrë formën e një CD-je dhe të promovohet me koncerte nëpër vende të ndryshme të botës. Në të bashkë janë bërë kompozimet e 20 grave nga Lindja e Mesme, Ballkani, Afrika e Jugut, Amerika Latine, Shtetet e Bashkuara të Amerikës dhe vendet perëndimore të Evropës. Goranci ka thënë se është hera e parë që gratë nga këto rajone bëhen bashkë në një projekt.

Mes emrave që ka bërë bashkë është edhe jordanezo-kanadezja Suad Bushnaq, e njohur për kompozime për filmat si “Al Munataf”, “Tëice Upon a Time” dhe “Tight Spot’, kompozitorja dhe pianistja nga Irani me bazë në New York, Niloufar Nourbakhsh, kompozitorja nga Maqedonia, Valentina Trajanovska, kompozitorja dhe dirigjentja serbe Isidora Zebeljan, kompozitorja shqiptare Eriona Rushiti, kompozitorja franceze e njohur veçanërisht në shekullin e 19-të, Pauline Viardot, kompozitorja bizantine Kassia, që konsiderohet si nismëtare e simfonive moderne në Kroaci, Dora Pejacevic, kompozitorja turke Nazife Aral Güran e të tjera.

Goranci, e cila studimet për solo-këndim i përfundoi në Akademinë e Muzikës në Tiranë, kurse ato master në “Buchmann-Mehta School of Music” në Tel-Aviv të Izraelit, ka treguar se projekti ”Udhëtim nëpër krijimet e grave” do të promovohet edhe me koncerte duke nisur prej Vjenës, pastaj në Luksemburg, Sofje e kështu me radhë. Goranci në Vjenë ndoqi studimet postdiplomike për këngët gjermane, franceze, spanjolle, angleze, si dhe për oratorio.

Në moshën 22-vjeçare debutoi me rolin e Rosinas nga opera “Il Barbiere di Siviglia” e G. Rossinit në Teatrin e Operës dhe Baletit në Tiranë. Ajo është fituese e bursës për këngëtarë të rinj opere nga fondacioni gjerman i Hilde Zadek, si dhe numëron disa çmime në konkurse ndërkombëtare. Role të tjera të realizuara në Tiranë, Izrael dhe Vjenë janë: Dorabella, Cherubino, Die Mutter, Ida, Dido dhe Bojana.

Ka punuar me regjisorë dhe dirigjentë të njohur si: Nikolaus Harnoncourt, Enrico Delamboye, Manfred Mayrhofer, Vittorio Parisi e të tjerë. Po ashtu, ajo ka realizuar edhe tri role kryesore në shfaqjet muzikore teatrale të regjisores amerikane Ellen Steëart, të vëna në skenën e Bienales së Venecias, në Teatrin e Butrintit dhe në Kosovë. Në vitin 2015, bashkë me ansamblin “Dielli”, që përfshin edhe instrumentistë nga Filharmonia e Vjenës, realizoi CD-në ndërkombëtare me këngë shqiptare të përpunuara, që e titulloi “Albanian Floëers”. Në vitin 2016 interpretoi rolin e Olgës nga “Eugene Onegin” të Tchaikovskyt në Festivalin e Operës në Alden Biesen në Belgjikë.