Kulturë

Thesare librash deri në katër shekuj të vjetër, në ekspozitë për publikun

Thesare antikuarësh e librash të rrallë nga shekujt 17-18 janë shpalosur në ekspozitën “Thesare nga Biblioteka e Arkivit”, të hapur nga Drejtoria e Përgjithshme e Arkivave, në Tiranë (Foto: Ministria e Kulturës)
 

Deri para një viti, ato ndodheshin në “mykun” e thasëve të magazinës së Arkivit të Shtetit. Si botime që datojnë prej fillimit të shekullit të 17-të, këta libra e antikuarë kanë të bëjnë me historinë, fenë, letërsinë e subjekte të tjera. Të digjitalizuara gjatë kohës së pandemisë nga punonjës të Drejtorisë së Arkivave të Shtetit, ky institucion të martën i ka ekspozuar për publikun këto thesare të panjohura

Nën xhamin e ekspozitës është edhe një libër prej qindra faqesh ku bien në sy kolona shpjegimesh me alfabet arab kundrejt fjalëve frënge. I botuar para 139 vjetësh, “Kamûs-ı Fransevî” (Fjalori francez) i gjeniut shqiptar, Sami Frashëri është veçse një nga thesaret e arkivit shqiptar.

Ky libër, tok me 10 antikuarë e katër libra të rrallë, është shpalosur me rastin e hapjes së ekspozitës “Thesare nga Biblioteka e Arkivit” nga Drejtoria e Përgjithshme e Arkivave.