Kulturë

Materiale arkivore edhe në Tiranë me kapitullin e demonstratave të 1981-s

Prej 11 marsit, ekspozita “Vullkani i Republikës” nisi të rrugëtojë në disa qytete të Kosovës për të mbërritur edhe në Tiranë, ku do të qëndrojë e hapur për tri ditë
 

Demonstratat e pranverës së vitit 1981 në Prishtinë, janë një moment kthese në historinë e Kosovës. Më shumë se dy muaj pas ekspozitës në Prishtinë, pikërisht aty ku nisën demonstratat, në Mensën e Studentëve, Agjencia Shtetërore e Arkivave të Kosovës ka realizuar këtë ekspozitë edhe në Tiranë, në Pazarin e Ri. Prej 11 marsit, ekspozita “Vullkani i Republikës” nisi të rrugëtojë në disa qytete të Kosovës për të mbërritur në kryeqytetin e Shqipërisë. Aty bëhen bashkë materiale dokumentare të kohës, në të cilat përthyhen perspektiva të ndryshme mbi demonstratat e marsit dhe prillit 1981

“Në nisje kjo ekspozitë që shënon këtë jubile u hap pikërisht në Mensën e Studentëve, aty ku nisi gjithçka më 11 mars të vitit 1981. Protesta e studentëve kishte karakter më tepër social por ajo brenda pak ditësh u rrit, pasi më 26 mars të po atij viti studentët nga qendra e tyre, dolën rrugëve të Prishtinës dhe ftuan e më pas iu bashkuan një pjesë e mirë e rinisë shkollore të asaj kohe”, ka thënë Bedri Zyberaj, kryeshef i Agjencisë Shtetërore të Arkivave të Kosovës.