Me evokime të kontributit të tij të vëllimshëm albanologjik, Instituti Albanologjik i Prishtinës ka përkujtuar bashkëpunëtorin e vet shumëvjeçar, Sadri Fetiu, i cili vdiq të hënën, në moshën 79-vjeçare.
Studiuesi i folklorit dhe letërsisë është vlerësuar si një nga emrat e përveçëm që la pas vetës një kontribut të çmuar albanologjik.
Në mbledhjen përkujtimore të mbajtur në mjediset e IAP-it, paraditen e së martës, kolegë, miq e dashamirë e kanë cilësuar Fetiun si albanologun e pakompromis, intelektualin e pathyeshëm dhe mbështetësin e parezervë të kolegëve e bashkëpunëtorëve.
Në fjalën e tij të mbajtur me këtë rast, drejtori i IAP-së, Hysen Matoshi, ka thënë se Fetiu kujdesin kolegial e kishte shndërruar edhe në kujdes prindëror për të gjithë bashkëpunëtorët.
“Profesor Fetiu e thoshte pa ngurrim atë që mendonte dhe e zbatonte atë që e thoshte”, ka thënë Matoshi.
Sipas tij, aktiviteti shkencor shumëvjeçar do ta bëjë të dallueshëm në mesin e albanologëve dhe organizator të jetës shkencore në vend.
“Ai ishte shndërruar në një autoritet që nuk buronte nga një mendësi autoritare, por që do të mbahet mend për përkushtimin e tij”, ka thënë Matoshi.
Lulëzim Lajçi, sekretar shkencor në IAP, ka thënë se Fetiu do të kujtohet jo vetëm si studiues i shquar, por edhe si njeri i mrekullueshëm.
“E admiroja atë si intelektual të shquar, por edhe si trim i madh”, ka thënë mes tjerash Lajçi.
Ndërkaq, varrimi i të ndjerit është bërë pasditen e së martës në varrezat e kryeqytetit në lagjen “Arbëria” në praninë e një numri të madh njerëzish.
I lindur në Peçan të Therandës, Sadri Fetiu qysh në fund të viteve ‘70 ishte angazhuar në fushën e studimeve të letërsisë popullore në IAP. Më 1987 në Fakultetin e Filologjisë së Universitetit të Prishtinës mbrojti tezën e doktoratës “Poetika e baladës popullore shqiptare”.
Në vitin 1991, Fetiu ishte ushtrues i detyrës së drejtorit e më vonë u zgjodh drejtor për dy mandate radhazi në krye të IAP-së.
© KOHA. Të gjitha të drejtat janë të rezervuara.
