Hollywood Foreign Press Association (HFPA), organizata që qëndron pas “Golden Globe Awards”, ka votuar për reforma të gjera që parashikojnë më shumë laramani dhe transparencë.
Organizata u gjend mes zjarrit në shkurt, pas një artikulli të botuar në “LA Times” që e fshikullonte asociacionin se nuk ka përfshirë as edhe një anëtar të vetëm afro-amerikan në trupën prej 87 vetash që përcakton çmimet. Ora ka bërë tik-taket e saj për HFPA, e cila ka njoftuar për reforma, sepse në të kundërtën do të ballafaqohej me largimin e më shumë se 100 publicistëve të Hollywoodit.
Duke i shkruar HFPA-së, ata kërkuan t’i jepej fund “sjelljes diskriminuese, joprofesionalizmit, shkeljeve etike dhe korrupsionit financiar”, thuhet në një deklaratë të grupit “Time’s Up”.
Megjithatë, në fund, organizata në fjalë njoftoi për miratimin e një pakete të gjerë reformash, duke përfshirë edhe zgjerimin e anëtarësimit për rreth 50 për qind në 18 muajt në vijim, me më shumë gazetarë afro-amerikanë, me angazhim të konsulentëve të diversitetit, si dhe duke hequr kufizimet e rrepta për ata që pranohen.
Ata njoftuan edhe se do ta theksojnë rekrutimin e gazetarëve afro-amerikanë dhe ta zgjerojnë rrethin e aplikuesve potencialë në grupin e gazetarëve të huaj.
“Vota masive e sotme për ta reformuar asociacionin ripohon përkushtimin tonë për të ndryshuar”, ka thënë presidenti i HFPA-së, Ali Sar. “Për shkak se ne e kuptojnë urgjencën dhe çështjen e transparencës, ne do t’i përditësojmë vazhdimisht anëtarët, teksa po shkojmë drejt asaj që organizata të bëhet më përfshirëse dhe më e larmishme”, ka thënë ai.
Grupi përbëhet prej rreth 90 gazetarëve dhe ushtron një ndikim të ndjeshëm në ngjarjen e dytë më të rëndësishme të çmimeve pas “Oscars”. Megjithëkëtë, organizata është kritikuar si përjashtuese – një numri të madh të gazetarëve nuk u është ofruar pranim, e që ka kushtëzuar zhbirim ndër vite.
Sidoqoftë, mungesa e laramanisë së grupit ka vazhduar t’i bëjë ballinat në këtë vit. Vetëm disa javë para afatit më 6 maj, organizata mori një goditje pas publikimit të një e-maili kundërthënës të dërguar nga anëtari kohëgjatë dhe ish-presidenti i HFPA-së, Filip Berk. Në një e-mail të dërguar kolegëve, ai e kishte ndarë një postim që e quante Black Lives Matter “një lëvizje raciste e urrejtjes”.
Grupi më pas humbi edhe një tjetër këshilltare kur menaxherja e famshme Judy Smith dha dorëheqje. Mbase tani tavolinat po përmbysen përfundimisht. Siç ka thënë vetë presidenti i HFPA-së Sar: “Përsëri, ne e kuptojmë se puna e vështirë nis tani. Ne jemi të përkushtuar për t’u bërë një organizatë më e mirë dhe shembull i laramanisë, transparencës dhe përgjegjësisë në industri”.
Përktheu: Salih Mehmeti
© KOHA. Të gjitha të drejtat janë të rezervuara.
