Allanit nuk i mungon guximi. Por nuk e ka atë stabil. E lë në mes të rrugës. Herë se është intelektual e nuk bën të veprojë dosido, e herë, thjesht nuk ia do. Udhëtimi i tij është një komedi romantike që ngjall të qeshura të publiku hap pas hapi. I tillë ishte edhe në inskenimin që i është bërë veprës “Provo edhe njëherë, Sam” të Woody Allen në teatrin e Prizrenit, “Bekim Fehmiu”. Nën regji të Ilir Bokshit, shfaqja e dhënë premierë të shtunën në qytetin jugor, ka mbushur sallën. Edhe më plot është dukur nëpërmjet të qeshurave të njëpasnjëshme. Allan (Ernest Malazogu) jeton midis realitetit dhe fantazive. Është aso tipi që mendon disa herë para se të veprojë. Kjo e bën që të mos veprojë gati asnjëherë dhe njëkohësisht e shndërron në një lloj figure komike. Kur ky personazh portretizohet nga Malazogu, kompletohet edhe më. E inskenuar për herë të parë më 1969 nga “Brodway” e po ashtu e “përkthyer” edhe në film më 1972, shfaqja në Prizren ka ardhur me një skenografi të që paraqet apartamentet amerikanë në pjesën e dytë të shekullit të kaluar.
Allanin e lë gruaja, Nancy (Liridona Shehu). Ajo herë e shtyn që ai të ketë të bëjë me gra të tjera e herë i sillet përreth duke e shtangur. Takimet që ai ka me gra të tjera, ato që njihen si “date” janë komedi brenda komedisë. Humb i tëri, përderisa një pjesë e ndërgjegjes e shtyn të veprojë e një tjetër, i thotë ‘mendohu’. E dyta zakonisht ia del. Për rreth një orë e gjysme ai orvatet poshtë e lart duke krijuara realitete imagjinare në kokë. Ndihma që mundohen t’ia japin miqtë e tij, rezulton e kotë. Allanit ia ha mendja se duhet të veprojë brenda kornizave që ia ka vënë vetes. Por nuk përton të provojë. Bile, ky është edhe mesazhi që nxjerr, pikërisht sikurse edhe vetë titulli i dramës.
Paralelisht me shfaqjen në skenë, zhvillohej edhe një tjetër “shfaqje” në atë që mund të përshkruhet si “lozhë” në Tetarin e Prizrenit. Një pjesë e ekipit të shfaqjes, përballimin e emocioneve të premierës e shtynin me birra e cigare. Me gjithë zhurmën që kanë bërë, vëmendja e publikut ishte te shfaqja, kur Allan mezi ia del që të krijojë një raport me një grua e cila qëllon të jetë bashkëshortja e mikut të tij më të ngushtë. Por nëpërmjet një humori të hollë të autorit të dramës dhe mjeshtërisë së regjisorit për ta nxjerrë atë në skenë, shfaqja e ka çuar në një tjetër nivel ambientin përballë skenës, në sallën e mbushur gati plot, jashtë rregullave shtetërore për ngjarje kulturore në kohë pandemie. Këtë e ka mundësuar edhe një “pakt” me fjalë midis përfaqësuesve të Policisë së Kosovës në ngjarje dhe menaxhmentit të Teatrit. Kësisoj, komedia është plotësuar edhe më.
Si një prej komedive më të mira të punuara nga regjisori Ilir Bokshi, e ka përshkruar shfaqjen, aktori Adrian Morina, i cili është edhe ushtrues detyre i udhëheqësit artistik të Teatrit Kombëtar të Kosovës.
“Një energji e jashtëzakonshme e aktorëve. Publiku e priti jashtëzakonisht mirë këtë komedi. Po shihet që njerëzit po vazhdojnë të vijnë në teatër dhe t’u pëlqejë komedia. Iliri është prej regjisorëve që di të bëjë mirë teatrin klasik e komedinë”, ka thënë Morina.
Regjisori Ilir Bokshi ka thënë se beson që Woody Allen është një prej komedianëve më të mirë që ka prodhuar shoqëria botërore. “Allen është ai njeri që për shijen time, shkruan dialogun më së miri në botë. Për këtë arsye, nuk është shumë e vështirë të bartet e të çohet në nivel teatror dialogu i tij i mrekullueshëm”, ka thënë ai.
Sipas Bokshit, është bërë një punë shumë e mirë dhe nuk do t’i shtonte asgjë shfaqjes që e ka pasur vitin kalendarik në tetarin “Bekim Fehmiu.
“Ka rezultuar me një duartrokitje të veçantë. Komedia normalisht që ec gjithkund. Është një humor i veçantë dhe kisha frikë se a do flejë te publiku. Por sonte jam shumë i kënaqur me reagimin e publikut dhe punën që kanë bërë bashkëpunëtorët e mi”, ka thënë ai. me koreografi të Robert Nuhës, kostume të Samka Ferrit, skenografi të Petrit Bakallit e muzikë të Art Lokajt, në shfaqje luajnë edhe aktorët Edona Sopaj, Alban Krasniqi, dhe Xhevdet Doda.
Aktori Ernest Malazogu ka thënë se pas shfaqjes ekziston ndjenja e zbrazëtisë, pasi përfundon prezantimi skenik.
“Besoj qe kemi mundur që t’ia përçojmë emocionit tonë publikut. Jam si në shtëpinë time. Kur i ke partnerët e mirë, gjithçka shkon mirë”, ka thënë ai.
Fetah Paçarizi i cili drejton teatrin “Bekim Fehmiu” në Prizren, ka thënë se ovacionet e publikut tregojnë se shfaqja është pritur shumë mirë. Për këtë ka thënë të jetë shumë i lumtur. Pos prodhimeve të teatrit që udhëheq, ka thënë se synojnë të ketë bashkëpunim më të madh me teatrot e tjera të vendit.
“Sigurisht që do të mundohemi të bëjmë shkëmbime me shfaqje teatrore të teatrove të tjera dhe të kemi një kalendar. Gjithmonë duhet të kemi parasysh edhe rrethanat e krijuara nga pandemia”, ka thënë ai. Allan që është personazhi kryesor i shfaqjes, mbetet pothuajse i njëjti nga fillimi e deri në fund. E kjo e mban shfaqjen gjithnjë në nivel, pavarësisht që është goxha e gjatë.
© KOHA. Të gjitha të drejtat janë të rezervuara.
