Këngëtarja me origjinë shqiptare, Rita Ora, ka zhvilluar një diskutim me kryetarin e Tiranës, Erion Veliaj.
Në nismën e quajtur “Diaspora flet 2020”, ata kanë folur rreth mundësive të reja që do i hapen shqiptarëve me përzgjedhjen që iu bë Tiranës, si Kryeqyteti Evropian i Rinisë për vitin 2022.
Rita Ora ka thënë se gjithmonë ka ndjerë nevojën që t’i shpreh botës së kush është dhe nga vjen.
“Për mua ishte shumë e rëndësishme t’i tregoja botës kush isha dhe nga vija dhe gjithmonë kam qenë si një libër i hapur për të. Gjithmonë kam qenë e inspiruar nga kultura e Shqipërisë, moda, veshjet tradicionale, muzika, arti. Gjithmonë e kam dashur kulturën shqiptare. Po t’i shikosh projektet e mia në vijim, janë të frymëzuara nga kjo kulturë” ka thënë Rita në këtë diskutim online.
Rita nuk ka përtuar që t’i tregojë edhe dëshirat e saj për ushqimet tradicionale shqiptare. Vezët me hajvar dhe specat me djathë, janë mëngjeset e preferuara për 29-vjeçaren.
“E dua mëngjesin dhe e kam ngaqë mamaja gjithmonë ka gatuar mëngjese të mira. Nuk tallem po të them që të preferuarat e mia janë speca me djathë, vezë në havjar dhe nuk e di nëse e them gabim, por gjithashtu dhe llokumet që i bën mamaja ime, me reçel dhe mjaltë. Nuk po them që është ushqimi më i shëndetshëm por është më i shijshëm,” ka thënë Rita.
Në anën tjetër, i pari i Tiranës ka thënë se 2022-ta do të jetë vit i koncerteve dhe i udhëtimeve andaj njerëzit duhet ta shfrytëzojnë çdo mundësi me përzgjedhjen e Tiranës si Kryeqyteti Evropian për Rininë.
Veliaj i ka bërë ftesë Rita Orës që të organizojë një koncert në Tiranë sapo të kalojë pandemia e koronavirusit.
© KOHA. Të gjitha të drejtat janë të rezervuara.
