Situata politike ku tre muaj pas zgjedhjeve vendi nuk ka ende Qeveri ka nisur të shkaktojë telashe edhe në funksionimin e Ministrisë së Kulturës. Për dallim nga vitet e kaluara, kur konkursi për projekte kulturore-artistike shpallej në fund të dhjetorit, kësaj radhe nuk ka ngjarë kësisoj.

Madje Ministria e Kulturës nuk ka ende një afat se kur do të shpallet konkursi. Përderisa organizatorët e aktiviteteve kulturore vazhdimisht janë ankuar se MKRS-ja vonohet në vlerësimin e projekteve e më pas edhe në transferimin e mjeteve, sivjet vonesat procedurale kanë nisur që nga hapi i parë, shkruan sot “Koha Ditore”.

Në kushte normale, Ligji për buxhetin e një viti miratohet në Kuvend në fund të vitit paraprak. Shteti sivjet ende nuk e ka Ligjin për buxhetin e vitit 2020. E Ministria e Kulturës ka ngelur peng sa i përket shpalljes së konkursit për projekte kulturore e artistike.

Jehona Shyti, drejtoreshë e Departamentit të Kulturës në MKRS, ka thënë se në bazë të Rregullores konkursi duhet të hapet pas miratimit të buxhetit.

(Artikullin e plotë mund ta lexoni sot në “Koha Ditore”)