Kronikë

Një muaj paraburgim për një tjetër të dyshuar në rastin e Zhurit ku u vra një polic

Gjykata Themelore e Prizrenit, Departamenti i Krimeve të Rënda, duke vendosur sipas kërkesës së Prokurorisë Themelore të Prizrenit, ka caktuar masën e paraburgimit në kohëzgjatje prej 30 ditësh, ndaj të pandehurit me iniciale A.G. nga fshati Brezne, Komuna e Dragashit.

Sipas njoftimit për media, i njëjti dyshohet se ka kryer veprën penale “shkaktimi i rrezikut të përgjithshëm” nga neni 356 par. 5 lidhur me par.1 dhe nenin 31 të KPRK-së, veprës penale “shkaktimi i rrezikut të përgjithshëm” nga neni 356 par. 4 lidhur me par.1 dhe nenin 31 të KPRK-së dhe veprës penale “mbajtja në pronësi, kontroll ose posedim të paautorizuar të armëve” nga neni 366 par.1 dhe nenin 31 KPRK-së.

Sipas njoftimit për media, masa e paraburgimit do të llogaritet prej datës së arrestimit, 12.02.2020 dhe do të zgjasë deri më datën 13.03.2020.

“Ekziston baza ligjore për caktimin e paraburgimit, nga neni 187 par.1 nën par 1.1. dhe 1.2., pika 1.2.3, të KPPRK-së, sepse dyshimin e bazuar e mbështesim në atë se i pandehuri me iniciale A.G. dyshohet se i ka kryer tri vepra penale në bashkëkryerje të cilat janë të natyrë së rëndë dhe që kanë rezultuar edhe me humbjen e jetës së një zyrtari policor gjatë kryerjes së detyrës zyrtare dhe lëndimin e rëndë edhe të dy zyrtarëve tjerë policor përfshirë edhe një qytetarë, si për shkak të dënueshmërisë së lartë që i kanoset të pandehurit nëse shpallet fajtor për këto vepra penale, gjykata gjeti se sipas kësaj baze ligjore duhet të caktohet paraburgimi nga arsyet e lartcekura”, thuhet në njoftim.