Policia me aksion në veri, has në rezistencë të armatosur e arreston disa persona Foto: Koha

Kurti për aksionin në veri: Po shtiren se po e mbrojnë Kosovën teksa po e vjedhin e po mbulojnë skandalet e fajdeve

28 May 2019 08:04
18:42

Kryetari i Lëvizjes Vetëvendosje, Albin Kurti, ndonëse e ka vlerësuar të duhur aksionin e sotëm në veri të Kosovës, e ka vlerësuar si jo të sigurt kur në krye të këtij aksioni janë prokurori Sylë Hoxha e presidenti Hashim Thaçi, të dy siç i quan Kurti, famëkeq, e me krahun e djathtë të tij Kadri Veselin dhe të majtin Ramush Haradinaj.

Kurti thotë se aksioni i tillë është i nevojshëm, porse korrupsioni në këtë pjesë ka ndodhur qysh moti.

“Tensionimi i kontrolluar. Këta që krimin e organizuar dhe korrupsionin e lartë e institucionalizuan duke e ushqyer përditë për dy dekada nga zyrat e tyre, duan ta luftojnë me aksione në terren një herë në vit. Krimi dhe kontrabanda në veri të vendit nuk ndodhën papritur - ato kanë vazhduar për aq sa ka vazhduar edhe zhvatja e hajnia në pjesën tjetër të vendit. Sigurisht që policia e ka mundësinë dhe aftësinë, drejtësia e ka detyrën dhe nevojën, kurse populli ynë e ka dëshirën dhe interesin për luftimin e krimit e të korrupsionit. Mirëpo, nuk mund të jemi të sigurt se për çka bëhet fjalë, kur në krye të një aksioni kundër krimit e korrupsionit ndodhet prokurori famëkeq Sylë Hoxha dhe presidenti aktual po ashtu famëkeq (me krahun e tij të djathtë, kryetarin e Kuvendit, dhe, krahun e tij të majtë, kryeministrin e vendit)”, ka shkruar Kurti.

Sipas Kurtit, këta po shtiren se po e mbrojnë Kosovën teksa po e vjedhin atë dhe duan t'i mbulojnë skandalet e fajdeve të tyre në paqe e të fotografive të tyre për luftë.

“Ndërkaq, presidenti i Serbisë, Vuçiq, shtiret se do ta sulmojë Kosovën, gjersa synon ta përforcojë pushtetin e tij. Serbisë i konvenon ky regjim i korruptuar në Kosovë dhe nuk i konvenon konflikti me KFOR-in. Prandaj, ky sot ishte veçse edhe një tensionim i kontrolluar për të mbuluar skandalet e regjimit”, ka shkruar Kurti.

Kurti thotë se asnjë nga top 20 zyrtarët e korruptuar në vendin tonë “nuk besoj të jenë arrestuar sot”.

“Çerdhja e korrupsionit dhe krimit në Kosovë, është te prokurimi dhe liçensat e shtetit, te prokuroria dhe gjyqësia e shtetit, te presidenti i shtetit. Korrupsioni dhe krimi duhen luftuar çdo ditë, por më mirë është t'i ndalojmë e parandalojmë duke i hequr këta që i kultivojnë dhe i shtojnë ato secilën ditë”, përfundon Kurti.

18:08

MPJ i kërkon sqarim UNMIK-ut për punonjësit e saj në barrikadën e veriorëve

Pas arrestimit të sotëm të shtetasit rus në veri të vendit, i cili i ishte bashkuar barrikaduesve serbë, ministri i Jashtëm i Kosovës, Behgjet Pacolli ka njoftuar se e ka thirrur UNMIK-un për sqaruar situatën e pranisë së zyrtarëve ndërkombëtarë dhe lokalë të UNMIK-ut në barrikadë.

“Sot, gjatë operacionit policor në veri të Kosovës, policia ka arrestuar një zyrtar ndërkombëtar të UNMIK-ut (shtetas rus) dhe një zyrtar lokal të UNMIK-ut. Ministria e Punëve të Jashtme e Republikës së Kosovës do ta trajtojë çështjen bazuar në të drejtën ndërkombëtare”, thuhet në prononcimin e Pacollit.


Lexoni edhe: 

Lirohet rusi i arrestuar në veri


“Policia e Kosovës ka njoftuar Ministrinë e Punëve të Jashtme për detajet e ngjarjes. Ministria e Punëve të Jashtme ka thirrur UNMIK-un për sqarime dhe do të vazhdojë të punojë ngushtë me autoritetet e zbatimit të ligjit për të sqaruar situatën e pranisë së zyrtarit ndërkombëtar dhe lokal të UNMIK-ut në barrikadë”, ka thënë më tej Pacolli.

14:26

Qalaj tregon ku dhe pse u arrestua shtetasi rus

Drejtori i Përgjithshëm i Policisë së Kosovës, Rashit Qalaj, në një konferencë për media, ka thënë se pas marrjes së urdhërarresteve për disa zyrtarë policorë e qytetarë, janë ndërmarr veprimet policore.

“Ka qenë përgatitje e shpejtë, por e planifikuar në detaje, dhe është realizuar në mënyrë efektive dhe pa pasoja. Aksioni ka filluar nga ora 6 e mëngjesit. Operacioni ka rrjedhur normalisht, pa pengesa, por bukur shumë probleme ka pasur në Zubin Potok, sepse në nisje të aksionit kemi hasur në pritë, në gjuajtje me armë në drejtim të policisë, me ç’rast kemi pasur një polic të plagosur lehtë. Nga plumbi i njëjtë, është goditur edhe një zyrtar tjetër policor, por që shpejtësia ka qenë e amortizuar dhe nuk ka arritur ta shpojë atë”, tha Qalaj, raporton Koha.net.

Ai tha se në këtë rrethanë të rezistencës së armatosur janë angazhuar edhe njësitet tjera dhe kanë nisur t’i eliminojnë barrikadat “me dhunë dhe kemi arritur t’i bastisim shtëpitë e lokacionet e planifikuara”.

“Mund të them se kemi pasur edhe tre zyrtarë tjerë të lënduar, por jo nga armët e zjarrit por nga heqja e barrikadave. Kemi edhe 6 qytetarët lë lënduar të cilët gjendeshin në barrikada”, deklaroi Drejtori i Policisë.

Ai tha se janë arrestuar disa qytetarë ndërsa deklaroi se operacioni ka qenë mjaft i suksesshëm dhe përkundër rezistencës në Zubin Potok, operacioni është realizuar me mjaft sukses.

“S’ka të lënduar rëndë. Në lokacionet e bastisura kemi gjetur 11 armë të zjarrit e disa telefona”, potencoi Qalaj .

Duke folur për shtetasin rus të arrestuar gjatë aksionit të sotëm në veri, Qalaj tha: “Në përpjekje për mënjanimin e barrikadave, ka qenë një veturë e UN-it brenda së cilës ka qenë edhe një zyrtar i UN-it dhe një zyrtar lokal që punon në UN. Ata janë arrestuar si pjesëmarrës në barrikada”.

14:18

IPK: Zyrtarët e arrestuar janë suspenduar nga detyra

Miradije Kelmendi nga IPK ka dhënë detaje nga aksioni i sotëm policor ndaj të dyshuarve për vepra të ndryshme penale.

Ajo ka thënë se me urdhër të Gjykatës Themelore të Prishtinës janë arrestuar dhjetëra persona të dyshuar për vepra të ndryshme penale.

“Janë arrestuar 19 punonjës policorë, 11 serbë, 4 shqiptarë dhe 4 boshnjakë. Nga ta është një Kapiten, 3 rreshterë dhe të tjerët zyrtarë policore. Gjatë bastisjeve janë konfiskuar armë, pajisje teknologjike dhe sasi parash”, tha Kelmendi, ndërsa potencoi se hetimet për këtë rast do të vazhdojnë.

Ajo potencoi se zyrtarët janë ndaluar për 48 orë dhe të njëjtit janë suspenduar nga detyra.

14:10

Prokurori Hoxha jep detaje për kapjen e zyrtarëve të dyshuar për korrupsion

Prokurori i Prokurorisë Speciale, Sylë Hoxha, në konferencën për media për aksionin policor në vend për kapjen e zyrtarëve të dyshuar në Polici dhe Doganë për krim të organizuar, ka thënë se veprimet procedurale për këtë operacion kishin nisur që nga prilli i vitit të kaluar.

Ai ka thënë se gjatë kësaj periudhe kanë dëgjuar një numër të konsiderueshëm të dëshmitarëve.

“Prokuroria Speciale e Kosovës i ka filluar veprimet procedurale qysh nga prilli i vitit të kaluar, ndaj disa personave të dyshuar për keqpërdorim të pozitës zyrtare, krim të organizuar, kontrabandim me mallra, marrje ryshfeti, dhënie ryshfeti e kështu me radhë. Gjatë kësaj periudhe në bashkëpunim me hetues të Inspektoratit dhe Policisë kemi kryer shumë veprime procedurale. Kemi marrë urdhëresat e Gjykatës Themelore dhe në bazë të tyre hetuesit kanë vepruar në terren. Pas këtij aktiviteti, thuajse njëvjeçar, Prokuroria pasi grumbulloi provat parashtroi kërkesë te Gjykata Themelore në Prishtinë, për një kërkesë për kontroll të shtëpive dhe lokaleve përcjellëse të këtyre të dyshuarve. Kemi eprorë policorë të arrestuar, zyrtarë të policisë, pjesëtarë të nacionalitetit serb, shqiptar e boshnjak. Në mesin e të dyshuarve kemi edhe qytetarë, jo zyrtarë, që kanë kryer veprimet e tyre për çka dyshohet, për kontrabandim të mallrave dhe veprat e ngjashme”, ka thënë ai.

12:34

Policëve të arrestuar u caktohet masa e ndalimit prej 48 orësh

KTV-ja merr vesh se policët e arrestuar në aksionet e sotme policore në vend janë dërguar në paraburgim dhe të njëjtëve u është caktuar masa e ndalimit prej 48 orësh.

11:47

Dhjetëra vetura të Policisë tërhiqen nga veriu

Dhjetëra autoblinda dhe vetura të Policisë së Kosovës janë tërhequr nga veriu i vendit para pak minutash, raporton KTV.

Policia e Kosovës sot ndërmori një aksion të gjerë në vend kundër kontrabandës e krimit të organizuar duke arrestuar dhjetëra zyrtarë, përfshirë edhe policë në veri të vendit.

Gjatë aksionit, PK u përball me rezistencë në veri.

11:37

KFOR: S’ndërhyjmë në aksionin e Policisë së Kosovës

Lidhur me situatën aktuale që po mbretëron në pjesën veriore të Kosovës pas aksionit të njësive speciale të Policisë së Kosovës, KFOR-i ka njoftuar se Policia e Kosovës po kryen një operacion policor në tërë Kosovën, pas fletarrestimeve të lëshuara nga Gjykata e Prishtinës në lidhje me një hetim mbi korrupsionin.

“KFOR-i informon se ky është vetëm një operacion policor dhe se as Forca e Sigurisë së Kosovës ose ndonjë forcë tjetër ushtarake nuk është vendosur në veri të Kosovës”, ka thënë KFOR-i në një komunikatë për media, raporton Koha.net.

Për shkak të ndjeshmërisë politike të momentit, komandanti KFOR-it ka ftuar të gjitha palët që të merren me mosmarrëveshjet në mënyrë paqësore dhe me përgjegjësi, pa asnjë forcë ose dhunë.

“Njerëzit duhet të qëndrojnë të qetë, nuk kanë asgjë për t’u frikësuar”, deklaron KFOR-i.

KFOR-i thotë se po vazhdon të monitorojë situatën dhe është i gatshëm të intervenojë, nëse kërkohet si përgjegjës i tretë, në mënyrë që të garantojë sigurinë për të gjitha Komunitetet, “në përputhje me mandatin e vet sipas Rezolutës 1244 të Këshillit të Sigurimit të Kombeve të Bashkuara”.

11:12

Vuçiqi mbledh Këshillin e Sigurisë, mediat në Serbi raportojnë për lëvizje ushtarake

E përditshmja serbe “”Blic” ka mësuar se presidenti i Serbisë, Aleksandar Vuçiq, ka ftuar Këshillin e Sigurisë Kombëtare për shkak të aksionit të sotëm të Policisë së Kosovës në veri të vendit.

Siç raporton kjo e përditshme, Vuçiqi ka paralajmëruar përfaqësuesit e BE-së se Serbia do të reagojë “nëse njësitet e ROSU-s nuk largohen sa më parë nga veriu i Kosovës”, transmeton Koha.net.

Sipas informacioneve të pakonfirmuara, ushtarë serbë janë vërejtur në kazermë në Kralevë, ku janë vënë në lëvizje automjete të blinduara, njofton agjencia serbe e lajmeve “Tanjug”.

10:27

Të arrestuarit në veri sillen në Prishtinë

Nëntë pjesëtarë të Policisë të arrestuar në veri të vendit janë sjellë në Prishtinë, më saktësisht në ndërtesën e Inspektoratit Policor të Kosovës, raporton KP.

Qysh në orët e hershme të mëngjesit në veri ka filluar një aksion për arrestimin e pjesëtarëve të Policisë të përfshirë në kontrabandë.

10:22

Operacioni policor në veri po vazhdon

Image

Policia është duke vazhduar me operacionin në veri të vendit, në kuadër të aksionit kundër kontrabandës e krimit të organizuar.

KTV raporton se njësitë e policisë po vazhdojnë të shkojnë akoma në veri, teksa edhe Policia e Kosovës ka konfirmuar se operacioni policor është në vazhdim e sipër.

Deri tash është raportuar për dhjetëra të arrestuar, e disa policë të plagosur. Policia ka thënë se nga ky aksion ka të arrestuar zyrtarë policorë shqiptarë, serbë e boshnjakë.

10:12

Në operacionin kundër krimit janë arrestuar policë shqiptarë, serbë e boshnjakë

Policia e Kosovës ka konfirmuar arrestimin e disa zyrtarëve policorë në rajone të ndryshme të Kosovës.

Sipas njoftimit, të arrestuar janë policë të nacionaliteteve të ndryshme: shqiptarë, serbë e boshnjakë.

“Operacioni policor i cili po shtrihet në disa rajone të ndryshme, përfshirë komunat Zveçan, Zubin Potok, Leposaviç, Mitrovicë Veri, Mitrovicë Jugu, Skenderaj dhe Drenas, deri më tani ka rezultuar me arrestimin e disa qytetarëve dhe disa zyrtarëve policorë të nacionaliteteve të ndryshme si shqiptarë, serbë dhe boshnjakë, të cilët kanë qenë të dyshuar”, ka njoftuar Policia.

Policia ka treguar edhe për hasjen në rezistencë të armatosur në veri të Mitrovicës, e në bllokada rrugëve, me ç’rast ka treguar se është detyruar të përdorë mjete të nevojshme për lirimin e rrugëve me qëllim të vazhdimit të operacionit policor.

“Si pasojë e pengesave të krijuara dhe pengimit të veprimeve policore në terren nga ana e disa qytetarëve në Veri të Mitrovicës, Policia e Kosovës ka shoqëruar në stacion policor edhe disa qytetarë të involvuar në këto raste”, thuhet në njoftim.

Në fund, Policia u ka bërë thirrje qytetarëve të mos bien pre e provokimeve të ndryshme, pasi ky “operacion policor ka për qëllim luftën kundër krimit dhe është në interes të të gjithë qytetarëve dhe vendit”.

Operacioni policor është ende në vazhdim e sipër.

09:29

Disa policë të plagosur nga aksioni në veri, asnjëri nga ta në gjendje të rëndë

Dy pjesëtarë të Policisë së Kosovës janë duke u trajtuar në spitalin e Mitrovicës pas aksionit të sotëm në veri.

Drejtori në Spitalin e Mitrovicës, Zahir Musa, ka thënë se një polic, i cili është plagosur gjatë këtij aksioni, është duke u trajtuar në repartin e kirurgjisë dhe është jashtë rrezikut për jetë, raporton KTV.

Gjithashtu, një koleg i tij i cili kishte qenë afër tij, ka marr disa gërvishtje dhe është duke u trajtuar në këtë spital.

Musa ka thënë se pas marrjes së terapisë, ata do të lirohen për trajtim në shtëpi.

Sipas Drejtorit në Spitalin e Mitrovicës, janë disa policë të tjerë të cilët janë duke u trajtuar në këtë spital por që sipas Musës, asnjeri prej tyre nuk ka lëndime serioze.

09:25

Rreth 30 të arrestuar nga aksioni i policisë, shumica zyrtarë

Rreth 30 persona janë arrestuar të martën nga aksioni i gjerë i Policisë së Kosovës.

Sipas burimeve të Koha.net, shumica janë zyrtarë.  Në mesin e të arrestuarve ka komandantë policie, policë e doganierë.

Vetëm në rajonin e Prizrenit mësohet se janë arrestuar katër doganierë e shtatë kontrabandistë. Aksioni po zhvillohet ende në gjithë vendin dhe është konfiskuar sasi e madhe e mallrave.

09:02

Policia thotë se aksioni në veri s’ka të bëjë me rastet e Zymerit e Ivanoviqit – një polic i plagosur

Policia e Kosovës ka njoftuar se operacioni policor i cili po realizohet sot në rajonin e Mitrovicës Veri dhe Mitrovicës Jugu, nuk ka të bëjë me rastin e vrasjes së Heroit Enver Zymeri dhe ish-politikanit Oliver Ivanoviq, siç u raportua në disa media serbe dhe lokale.

“Këtij operacioni policor i ka paraprirë një hetim disamujor i IPK-së dhe PK-së i udhëhequr nga Prokuroria Speciale e Kosovës, i cili ka rezultuar me dyshimin e bazuar të përfshirjes së disa zyrtarëve policorë dhe të disa qytetarëve në veprimtari kriminale ‘pjesëmarrje ose organizim i grupit kriminal’ dhe vepra tjera të specifikuara. Ky operacion policor është ende në vazhdim e sipër. Si pasojë e rezistencës në Veri të Mitrovicës, një zyrtar policor është plagosur por është jashtë rrezikut për jetë, përderisa deri më tani janë arrestuar disa zyrtarë policorë, disa qytetarë si dhe janë konfiskuar gjësende të ndryshme përfshirë edhe disa armë”, ka bërë të ditur Policia, raporton Koha.net.

08:53

Aksion i gjerë i Policisë dhe i Doganës në Kosovë, priten shumë arrestime

Policia dhe Dogana e Kosovës kanë nisur një aksion të gjerë në gjithë territorin e vendit.

Burime të Koha.net brenda Policisë dhe Doganës kanë bërë të ditur se rreth 400 zyrtarë policorë e hetues të Doganës po merren me aksionin anti-kontrabandë në gjithë territorin.

“Aksioni anti-kontrabandë po zhvillohet në gjithë vendin. Në shumë pjesë të vendit, përfshirë edhe veriun, pritet të ketë shumë arrestime”, ka thënë ky burim.

08:43

Arrestohet komandanti i policisë në Zubin Potok, serbët bllokojnë rrugën

Gjatë aksionit që po zhvillohet në veri të vendit, sipas burimeve, është arrestuar edhe komandanti i Policisë së Kosovës në Zubin Potok, i cili është i nacionalitetit serb.

Policia gjatë bartjes së të arrestuarve në drejtim të Mitrovicës, kishte hasur në barrikadë të vendosur nga banorët serbë, por ka arritur ta thyejë për të vazhduar rrugën.

Ndryshe, në lidhje me këtë ngjarje tashmë kanë reaguar zyrtarët më të lartë të vendit, por dhe të Serbisë.

08:34

Gjuriqi: Nëse ndërkombëtarët nuk e ndalin Policinë e Kosovës, Serbia do të kundërpërgjigjet

Drejtori i Zyrës për Kosovën në Qeverinë e Serbisë, i tha RTS-së se në emër të presidentit të Serbisë, Aleksandar Vuçiq,i ka informuar përfaqësuesit ndërkombëtar se nëse nuk e ndalin aksionin e Prishtinës, se kundëraksioni i Serbisë do të ndërmirret brenda ditës së sotshme.

Siç citohet nga mediat serbe, ai ka thënë se "forcat ROSU në Zubin Potok po sulmojnë popullsinë e paarmatosur serbe", transmeton Koha.net.

08:17

Vuçiqi urdhëron ushtrinë e Serbisë të jetë në gjendje gatishmërie luftarake pas ndërhyrjes policore në veri

Presidenti i Serbisë, Aleksandar Vuçiq, ka urdhëruar vënien e të gjitha njësiteve të ushtrisë së Serbisë në gjendje të plotë lufte, ka njoftuar televizioni publik serb.

Ky urdhër vjen pas ndërhyrjes së forcave policore në veri të vendit, ku raportohet për disa të arrestuar dhe, burime të Grupit Koha bëjnë me dije se një polic është plagosur, transmeton Koha.net.

Sipas mediumit serb, edhe njësitet speciale të MPB-së serbe janë në gjendje gatishmërie.

08:15

Një polic plagoset në veri

Sipas disa burimeve të Koha.net, të paverifikuara nga zyrtarët, një polic është plagosur në këtë aksion.

Mësohet se ai është plagosur në këmbë dhe gjendja e tij është stabile.

08:04

Policia me aksion në veri, has në rezistencë të armatosur e arreston disa persona

Policia e Kosovës ka njoftuar se të martën në bashkëpunim me Inspektoratin Policor është duke realizuar një operacion në veri të vendit që ka rezultuar me ndalimin e disa zyrtarëve policorë dhe qytetarëve.

Sipas njoftimit nga Policia, këtij operacioni i ka paraprirë një hetim disamujorë i IPK-së, PK-së i udhëhequr nga Prokuroria Speciale, që ka rezultuar me dyshimin e bazuar të përfshirjes së disa zyrtarëve policorë dhe disa qytetarëve në “Pjesëmarrje ose Organizim i Grupit Kriminal”, në lidhje me veprat tjera penale si; “Kontrabandim me Mallra”, “Keqpërdorim i Pozitës Zyrtare”, “Dhënie e Ryshfetit”, “Tregti e Ndaluar” etj.

Policia ka thënë se ka has në rezistencë të armatosur në veri të Mitrovicës, por operacioni është duke vazhduar, “përfshirë arrestimin dhe kontrollin e disa lokacioneve të cilat kanë rezultuar me konfiskimin e dëshmive relevante përfshirë edhe armë të gjata”.

“Policia e Kosovës, në bashkëpunim me organet e drejtësisë, Inspektoratin Policor mbeten të përkushtuara në realizimin e detyrave dhe përgjegjësive të saj ligjore, me qëllim të ruajtjes së rendit dhe qetësisë publike, parandalimit të veprimtarive të kundërligjshme, pa marrë parasysh përfshirjen e personave në raste të tilla penale”, thuhet në njoftim.

Sipas Kosovapressit, të paktën pesë persona janë arrestuar deri tash. Raportohet po ashtu se në aksion po kërkohen edhe të dyshuarit për vrasjen e policit Enver Zymberi e Oliver Ivanoviqit.

Policia ka bërë të ditur se për detajet do të njoftojë më vonë.

© KOHA. Të gjitha të drejtat janë të rezervuara.

Komentet

Pera28/05/2019 15:46

Nëse i arrestoni serbët dhe u kërkoni shqiptarëve të vijnë në polici, ne nuk jemi budallenj, po ngrohni tanke dhe avionë, përgatituni për të luftuar atdheun tuaj të ligjshëm në Shqipëri, por nuk mendoj se edhe fshati juaj do të jetë atje.

Kemi29/05/2019 09:58

E përgëzoj Policinë që me profesionalizëm po e kryen detyrën shtetrore por edhe mbar Populli duhet të jet përkrah tyre - Syqel.Ju lumt.

Shto koment

Të ngjashme