Një person nën gërmadha pas shembjes së mureve të ish-Adriatikut në Mitrovicë Foto: Koha

Gjendet pa shenja jete punëtori që u zu nga shembja e ish-hotelit Adriatik

Donika Voca Gashi Donika Voca Gashi 22 April 2019 18:03
00:20

Është gjetur pa shenja jete, trupi i punëtorit që u zu nga muret e ish-hotelit Adriatik në Mitrovicë, që u shembën të hënën rreth orës 17:00.

Më shumë se gjashtë orë ka zgjatur kërkimi i shumë ekipeve të kërkim shpëtimit, përfshirë edhe ato të FSK-së.

Trupi i pajetë është gjetur rreth orës 00:15 të së martës.

KTV mëson se i ndjeri ishte 27 vjeçar. 

KTV-ja, që po përcjell ngjarjen në vend të ngjarjes, ka mësuar se zyrtarë të Mjekësisë Ligjore tashmë e kanë marrë viktimën për obduksion.

Nehat Bahtiri, drejtor për Shpëtim në komunën e Mitrovicës, ka thënë se procesi i kërkimit ka qenë delikat sepse ka pas shpresa që viktima mund të ishte gjallë.

“Pas një pune shtatë orëshe, kemi arritur të gjejmë trupin e viktimës të cilin kemi shpresuar ta gjejmë të gjallë. E kemi gjetur pa shenja jete, u shprehim ngushëllime familjarëve. Procesi ka qenë shumë delikat sepse kemi shpresuar se viktima ishte ende gjallë. Jemi munduar me veprime të ngadalshme”, ka thënë ai.

00:00

Ndalohen për 48 orë punëdhënësi dhe punëkryerësi për shembjen në Adriatik, kërkimi për punëtorin vazhdon

Kërkimi për punëtorin që e zuri shembja e një pjese të ish-hotelit Adriatik në Mitrovicë, ka hyrë edhe në orët e para të ditës së martë (23 prill).

Kërkimet janë intensifikuar dhe prej rreth orës 23:00 ka nisur të përdoret eskavatori.

KTV-ja, që po vazhdon të qëndrojë në vend të ngjarjes, merr vesh se janë intervistuar tre dëshmitarë, përkatësisht punëtorët që kishin shpëtuar nga kjo shembje.

Ndërsa Prokuroria tashmë ka ndaluar për 48 orë punëdhënësin dhe punëkryerësin, ka konfirmuar për KTV-në prokurorja Fetije Bajrami.

21:05

Me qen të trajnuar, FSK ka nisur kërkimin e punëtorit në gërmadhat e ish-Adriatikut

Në vendngjarje kanë arritur pjesëtarët e FSK-së, të njësitit për kërkim dhe shpëtim.

Ata, me qen të trajnuar për këso rastesh kërkimi po synojnë që ta gjejnë në gërmadha punëtorin që ishte duke punuar në rinovimin e ish-hotelit, kur një pjesë e mureve të tij u shemb.

20:56

FSK-ja niset për të ndihmuar kërkimin e punëtorit te ish-Adriatiku, Prokuroria ka nisur hetimet

Njësiti i FSK-së për kërkim dhe shpëtim është nisur drejt Mitrovicës, për të ofruar ndihmën e nevojshme në kërkimin e njërit prej punëtorëve që e zunë muret e rrënuara të ish-hotelit Adriatik në Mitrovicë.

Ata pritet të arrijnë brenda pak minutash, raporton KTV.

Ndërkohë, prokurorja e rastit Fetije Bajrami ka thënë se fillimisht janë në vendin e ngjarjes në kërkim të personit që dyshohet se është nën rrënoja e më pas do të ndërmarrë masa te tjera për këtë rast.

Kërkimi për njërin nga 4 punëtorët që po kryenin rinovimin në ish-hotelin e privatizuar ka nisur që nga ora 18:00. Tre prej tyre kanë shpëtuar, ndërsa tjetri është ende në kërkim.

Siç ka thënë më herët drejtori për Mbrojtje dhe Shpëtim në Komunën e Mitrovicës, pronari i ri i hotelit të privatizuar apo punëkryerësi i punimeve rinovuese nuk ka pasur leje adekuate nga Drejtoria e Urbanizmit, për prekjen e shtyllave brenda godinave.

20:34

Kërkimi për punëtorin te ish-Adriatiku ka hyrë në orën e tretë, punëkryerësi nuk kishte leje pune

Kërkimi për punëtorin e katërtë në ndërtesën e ish-hotelit Adriatik, një pjesë e të cilit u shemb sot pasdite, ka hyrë në orën e tretë.

Nehat Bahtiri, drejtor për Mbrojtje dhe Shpëtim në Komunën e Mitrovicës, ka thënë se po kërkojnë me delikatesë në gërmadhën e objektit.

“Zbrazëtira mes katit të parë dhe pllakës së shembur është shumë e vogël, aq sa është shpresa jonë që ai është në atë pjesë dhe është gjallë”, ka thënë Bahtiri, që ka treguar se kanë marrë informatën për shembjen e një pjese të këtij objekti rreth orës 17:00.

“Rreth orës 5 kemi marrë një thirrje për shembje të objektit në fjalë, ish-hotelit Adriatiku, i cili deri vonë ka qenë në pronësi të AKP-së dhe së fundi është privatizuar. Ata kanë qenë duke kryer punime rinovuese dhe si pasojë është shembur një pjesë e objektit”, ka thënë Bahtiri, në një paraqitje direkte për KTV-në, nga vendi i ngjarjes.

“Jemi mobilizuar në bashkëpunim me zjarrfikësit dhe komunarët. Deri tash, prej orës 18:00 jemi duke gërmuar me shumë delikatesë që të shohim nëse mund ta gjejmë. Deri tani nuk kemi arritur”, ka thënë më tej ai.

Ai ka thënë se pronari i ri apo punëkryerësi i rinovimit nuk ka leje për punë nga Drejtoria e Urbanizmit e Komunës.

“Unë nuk e di me çfarë logjike kanë rrënuar shtyllat të cilat kanë qenë në këtë objekt”, ka thënë ai.

Image
19:48

Po vazhdon kërkimi i personit që mbet nën gërmadha pas shembjes së ish-Adriatikut

Është duke vazhduar kërkimi i një personi që gjendet nën gërmadhat e ish-hotelit Adriatik në Mitrovicë.

Ekipet e zjarrfikësve bashkë me ato të shpëtimit janë duke gërmuar për të gjetur personin që dyshohet se ishte duke punuar në këtë ndërtesë në momentin kur ndodhi shembja, raporton KTV.

Image
18:27

Katër punëtorë po punonin te ish-Adriatiku, tre kanë shpëtuar i katërti ende nën rrënojë

Policia në Mitrovicën Jugore ka dhënë detaje rreth shembjes së sotme të një pjese të ish-hotelit “Adriatiku”, ku dyshohet se brenda rrënojave ka mbetur një punëtor, për shpëtimin e të cilit janë angazhuar zjarrfikësit.

Komandanti i policisë në Mitrovicë Ahmet Gjosha ka thënë për KsP se kanë qenë gjithsej katër punëtorë duke punuar në vendin ku është shembur një pjesë e objektit.

Sipas tij, tre prej tyre kanë arritur të dalin jashtë derisa dyshohet se njëri ka mbetur brenda dhe po punohet në mënyrë intensive për shpëtimin e tij.

Në vendin e ngjarjes kanë dalë njësitet e zjarrfikësve, autoambulanca, si dhe një kompani ka dërguar ekskavatorë për pastrimin e hapësirës nga rrënojat.

18:03

Një person nën gërmadha pas shembjes së mureve të ish-Adriatikut në Mitrovicë

Një pjesë e mureve të ish-hotelit Adriatik në Mitrovicë janë shembur pasditen e së hënës, mëson KTV-ja.

Lajmin e ka konfirmuar edhe i pari i kësaj Komune Agim Bahtiri. Ai ka thënë se një pjesë e ish-hotelit "Adriatiku" është shembur, ku për pasojë dyshohet se një person është zënë nga gërmadhat.

“Ju bëjë apel organeve të sigurisë që ta japin maksimumin për shpëtimin e tij, dhe po ashtu kërkoj nga kompanitë ndërtimore që posedojnë makineri adekuate të dalin urgjentisht në vend të ngjarjes për heqjen e gërmadhave me mjetet e tyre”, ka thënë Bahtiri, teksa ka shprehur keqardhjen që nuk ndodhet aktualisht në Kosovë.

  • Foto: Koha
  • Foto: Koha

Portali Koha.net ka provuar që të mësojë më shumë detaje, por zyra për media e rajonit të Mitrovicës në Policinë e Kosovës, nuk ka qenë e qasshme.

© KOHA. Të gjitha të drejtat janë të rezervuara.

Komentet

Shto koment

Të ngjashme