Gjykata Themelore në Gjilan ka shpallur aktgjykim dënues ndaj të akuzuarit A. R, i dyshuar për “vrasje e rëndë në tentativë” dhe “mbajtja në pronësi, kontroll të armëve”.
I akuzuari, sipas Gjykatës, më datë 24.01.2011, rreth orës 17:00, në lagjen “Dheu i Bardhë” në Gjilan, “me paramendim dhe me dashje ka tentuar të privojë nga jeta të dëmtuarin B. L., duke shtënë me armë ndaj tij, e godet në krahun e majtë, dy herë në dy këmbët dhe njëherë në shpinë, gjithashtu ka shtënë edhe njëherë në drejtim të dëmtuarit K. S., me ç’rast predha shkon afër syrit, duke i shkaktuar lëndime të rënda trupore”.
“Këto veprime të të akuzuarit A. R., kanë ardhur si hakmarrje ndaj të dëmtuarit B. L., pasi që ky i fundit një muaj më herët kishte therë me thikë vëllanë e të akuzuarit A. R. Me këto veprime i akuzuari ka kryer veprat penale, vrasje e rëndë në tentativë dhe mbajtja në pronësi, kontroll të armëve, vepra të sanksionuara me Kodin Penal të Kosovës (KPK)”, bën me dije Gjykata.
“Trupi gjykues i departamentit të Krimeve të Rënda, pas shqyrtimit të të gjitha provave dhe dëgjimit të dëshmitarëve, për dy veprat penale ka shqiptuar një dënim unik prej 4 vite e 10 muaj burgim”, potencon Gjykata.
Gjykata ka liruar nga akuza të pandehurin Rr. R, pasi që nuk është vërtetuar se ka kryer veprën penale “mbajtja në pronësi, kontroll të armëve”.
Palët kanë të drejtën e ankesës ndaj këtij vendimi në Gjykatën e Apelit.
