Vetura e një personi të raportuar si i zhdukur, mashkull K-Serb nga Zubin Potoku, është gjendur nga Policia e Kosovës.
Pas ekzaminimit nga Forenzika e Policisë së Kosovës, janë gjendur njolla gjaku në ulësen e parme të veturës si dhe një vrimë që dyshohet të jetë bërë nga arma e zjarrit, transmeton koha.net.
Vetura është gjetur në fshatin Matica të komunës së Zveçanit, ndërsa vazhdon kërkimi i personit të zhdukur.
Policia e Kosovës mbrëmë ka gjetur veturën e Vllado Ivanoviq i cili është raportuar si i zhdukur që nga data 28 shkurt.
Zëvendëskomandanti i Policisë në veri, Besim Hoti, ka thënë se në veturën e gjetur e cila i takonte taksistit, ka elemente të veprës penale, por pasi që personi ende nuk është gjetur, policia po e trajton si person të humbur, raporton KTV.
Sipas Hotit, hetimet janë në fazën fillestare dhe se policia është në kërkim të këtij personi, të cilin motra e tij e kishte raportuar si të zhdukur që nga 28 shkurti.
