Disa persona të maskuar dhe të armatosur e kanë shpërthyer me eksploziv një bankomat në Gjilan, ka njoftuar Policia e Kosovës.
Zëdhënësi për media i Policisë për rajonin e Gjilanit, Valon Osmani, i ka thënë KOHËS se rasti ka ndodhur të hënën në orën 05:22 në rrugën “Isuf Kika”, ndërsa pos dëmeve materiale s’ka të lënduar.
Sipas Osmanit, të dyshuarit janë larguar në drejtim të panjohur pa arritur që të kryejnë vjedhjen.
Me datën 20.11.2023 rreth orës 05:22 jemi njoftuar se në rrugën ‘’Isuf Kika’’ në qytetin e Gjilanit, persona të panjohur për momentin, të maskuar dhe të armatosur, me mjet eksploziv kanë shpërthyer një bankomat të një banke komerciale. Në vendin e ngjarjes kanë dalë njësitet policore relevante, njësiti i hetimeve rajonale, krime teknika dhe njësiti për menaxhim të eksplozivëve nga Policia e Kosovës. Përpos dëmeve materiale në bankomat lëndime trupore nuk ka pësuar askush nga ky rast. Në bazë të hetimeve të para të dyshuarit nga ky rast kanë arritur që të largohen në drejtim të panjohur për momentin pa arritur që të kryejnë vjedhjen”, thuhet në njoftimin policor.
Hetimet po vazhdojnë, e rasti është iniciuar si “vjedhje e rëndë në tentativë” dhe “shkaktim i rrezikut të përgjithshëm”.
© KOHA. Të gjitha të drejtat janë të rezervuara.
