Policia e Kosovës ka bërë të ditur se ka arrestuar të hënën një inspektor të Punës.
I dyshuari A.H., inspektor pune në ministri, dyshohet për keqpërdorim të detyrës zyrtare.
Dyshohet se inspektori, kishte gënjyer në një raport që e kishte përpiluar, ku një punëtor ishte lënduar në vendin e punës.
Inspektori kishte dal në vendin e ngjarjes, dhe në raport kishte shkruar se punonjësi është lënduar në shtëpinë e tij, duke i bërë favor kompanisë ku po punonte punonjësi.
Po ashtu, siç ka njoftuar Policia, është mësuar se punëtori nuk kishte fare kontratë pune, posë kontrata e punës është proceduar në ATK një ditë pas lëndimit të tij.
“Dyshohet se personi i lartcekur ka dal në vendin e ngjarjes, gjegjësisht në një vend punishte të një kompanie, në të cilën vend punishte ishte lënduar një punëtor i kësaj kompanie, duke marrë lëndime të rënda trupore dhe i njëjti (Inspektori i Punës A.H.) edhe pse ishte venë në dijeni edhe nga hetuesit policor se punëtori ishte lënduar në vendin e tij të punës, për çka kishte edhe dëshmi video-incizim dhe dëshmitar eventual, i dyshuari përkundër këtyre fakteve, përpilon “Raport Zyrtar” për Hetimin e Aksidentit, duke mos e paraqitur gjendjen faktike/reale në ketë raport, por ka potencuar se viktima ishte rrezuar në shtëpinë e tij, duke i bërë favor me këtë rast pronarit të kompanisë punë kryese. Lidhur me rastin është kuptuar edhe nga dëshmitë relevante të siguruara përgjatë veprimeve hetimore se viktima nuk ka pasur fare kontratë të punës, por kontrata e punës për viktimën është proceduar në ATK një ditë pasi që ka ndodh aksidenti/lëndimi në punë i viktimës”, thuhet nga Policia.
Inspektori është ndaluar për 48 orë.
“Mbi bazën e këtyre veprimeve është krijuar dyshimi se i dyshuari i lartcekur me inicialët (A. H.), dyshohet se ka kryer veprën penale: “Keqpërdorim i pozitës apo autoritetit zyrtar” sipas kodit penal të RKS-së. Andaj, në konsultim dhe koordinim me Prokurorin kompetent nga PTH – Prishtinë, sot me datë 26.06.2023, i dyshuari i lartcekur me iniciale është shoqëruar në polici, është intervistuar në cilësinë e personit të dyshuar në prezencën e Avokatit Mbrojtës dhe me Aktvendim mbi ndalimin nga Prokurori kujdestar dërgohet në mbajtje prej 48 orëve”, thuhet në njoftimin e Policisë.