Prokuroria Themelore në Gjilan ka bërë të ditur se ka ndaluar një menaxher të kompanisë “Viva Fresh Store” në Gjilan.
Sipas Prokurorisë i ndaluari L.V. dyshohet se “duke vepruar në kundërshtim me autorizimet e tij ekonomike dhe duke keqpërdorur besimin e kompanisë”, e ka dëmtuar kompaninë në vlerë afro 21 mijë euro.
Të dyshuarit i është caktuar masa e ndalimit prej 48 orëve.
“Prokuroria Themelore në Gjilan, në koordinim me Policinë e Kosovës – Njësinë Rajonale për Hetimin e Krimeve Ekonomike dhe Korrupsionit në Gjilan, pas zhvillimit të veprimeve hetimore, ka ndaluar të dyshuarin L.V., punëtor në ndërmarrjen “Viva Fresh Store", në njësinë nr.2 në Gjilan. Ekziston dyshimi se i njëjti, duke vepruar në kundërshtim me autorizimet e tij ekonomike dhe duke keqpërdorur besimin e kompanisë, e ka dëmtuar kompaninë në vlerë financiare mbi 20,871.24 €. Me këto veprime, dyshohet se ka kryer veprën penale ‘’Keqpërdorimi i besimit’’, nga neni 330 të Kodit Penal të Republikës së Kosovës. I dyshuari L.V., me urdhër të prokurorit gjendet në ndalim 48 orësh dhe ndaj tij brenda afatit ligjor do të kërkohet masa për sigurimin e të pandehurit në procedurë penale”, thuhet në njoftimin e Prokurorisë Themelore në Gjilan.
Sipas Policisë së Kosovës, i dyshuari ishte menaxher në “Viva Fresh Store”. Dyshimet janë se artikujt e blerë nga konsumatorët, fillimisht janë regjistruar nga i dyshuari, por për t’i përvetësuar paratë, “ai nuk ka printuar fare kuponë fiskalë”.
“I dyshuari i lartcekur me iniciale është intervistuar nga Policia në prani të avokatit të tij mbrojtës dhe në bazë të dyshimit të arsyeshëm, prokurori i shtetit ka nxjerrë aktvendim për ndalimin e tij për 48 orë, për vepër penale “Keqpërdorimi i besimit” sipas kodit penal të Republikës së Kosovës”, thuhet nga Policia.
