Kapen në Prishtinë 40 kg marihuanë me vlerë prej rreth 80 mijë eurosh
Foto: Policia e Kosovës
Policia e Kosovës ka arrestuar një 36-vjeçar në Prishtinë pasi në veturë iu gjet një sasi prej rreth 40 kg drogë e llojit marihuanë.
Sipas njoftimit të Policisë, vlera e drogës është vlerësuar të jetë rreth 80 mijë euro.
“Sot, më 05.01.2023, rreth orës 17:08, është arritur të lokalizohet dhe identifikohet një i dyshuar i përfshirë në veprën penale ‘blerja, posedimi, shpërndarja dhe shitja e paautorizuar e narkotikeve, substancave psikotrope dhe analoge’. Hetuesit policorë, në koordinim me organet e drejtësisë kanë realizuar Planin Operativ ‘Mjegulla’, gjatë realizimit të së cilit, në flagrancë është arrestuar i dyshuari: N.B., (viti i lindjes 1986, mashkull kosovar), i cili po transportonte me një veturë me targa vendore, substancë narkotike që dyshohet të jetë marihuanë. Gjatë kontrollimit të veturës janë gjetur rreth 40 kg substancë narkotike, e cila dyshohet të jetë e llojit marihuanë, e ndarë në 40 paketime të mbështjella me qese plastike. Vlera e kësaj sasie sillet rreth 80 mijë euro dhe dyshohet se vendi ynë ishte transit i kalimit të kësaj sasie, kurse destinacion final ishin vendet e perëndimit”, thuhet në njoftimin e Policisë.
