Policia e Kosovës ka bërë të ditur se ka arrestuar një person në Obiliq, nën dyshimin për legalizim të përmbajtjes së rreme, falsifikim të dokumentit dhe mashtrim, derisa në rast janë të përfshirë edhe dy zyrtarë komunalë.
Sipas njoftimit të enjten, i dyshuari i parë R.H., është dërguar në mbajtje, derisa dy zyrtarët komunalë, A.B., dhe N.K.SH., janë liruar në procedura të rregullt.
“Hetuesit policorë nga Njësia Rajonale për Hetimin e Krimeve Ekonomike dhe Korrupsionit (NjRHKEK) – Prishtinë, në bashkëpunim me Prokurorinë Themelore në Prishtinë, kanë trajtuar një rast ku të përfshirë kanë qenë zyrtarë nga Komuna e Obiliqit dhe një qytetar. Dy të dyshuarit: A. B. dhe N.K.Sh. (zyrtarë komunal), dyshohet se janë përfshirë në veprën penale: ‘keqpërdorim i pozitës apo autoritetit zyrtar’. Kurse, i dyshuari R.H., dyshohet se ka kryer veprat penale: ‘legalizim i përmbajtjes së rreme’ , ‘falsifikim i dokumenteve’ dhe ‘mashtrim’. Rasti është trajtuar nën dyshimin se një pronë është tjetërsuar në mënyrë të kundërligjshme”, thuhet në njoftim.
© KOHA. Të gjitha të drejtat janë të rezervuara.
