Arrestohet i dyshuari për vrasjen e babait dhe vëllait në veri

Policia e Kosovës ka arrestuar të dyshuarin për vrasjen e babait dhe vëllait mëngjesin e së premtes në veri të Mitrovicës.

Lajmin për KOHËN e ka konfirmuar zëvendësdrejtori i policisë në veri, Besim Hoti i cili ka thënë se vrasja është kryer me thikë.

“Është arrestuar një i dyshuar për vrasjen me mjet të mprehtë-thikë të babait dhe vëllait të tij”, ka thënë Hoti.

Një ngjarje e rëndë ka ndodhur në orët e hershme të mëngjesit të së premtes në një familjen në veri të Mitrovicës, ku kanë mbetur të vdekur dy persona.

Burime të KosovaPress-it bëjnë të ditur se pas një mosmarrëveshjeje mes vete në një familje të komunitetit serb, ku janë përfshirë disa anëtarë të familjes, djali ka sulmuar me thikë babain me ç’rast e ka plagosur rëndë.

Sipas këtyre burimeve, në këtë incident është përfshirë edhe djali tjetër i kësaj familje, i cili dyshohet se duke i ndihmuar babait, ka vrarë vëllain e tij.

Burimet më tej kanë shtuar se babai i plagosur fillimisht është dërguar në spital derisa ishte në gjendje kritike për jetën, ku më pas kanë vdekur.

Sipas burimeve, bëhet fjalë për vëllezërit binjakë U. B., dhe M. B., ndërsa babai i tyre që mbeti fillimisht i plagosur është avokati M.B.

I kontaktuar nga KosovaPress, zëdhënësi i policisë për rajonin e veriut, Branisllav Radoviq, e ka konfirmuar lajmin.

"Zyrtarisht nuk kam marr akoma ndonjë raport. Ajo që di deri më tani, bëhet fjalë për dhunë në familje ku ka edhe të vrarë", ka thënë shkurt Radoviq.