Aksident zinxhiror afër Fushë-Kosovës, i përfshirë edhe një autobus
Një aksident ku janë përfshirë disa automjete ka ndodhur mëngjesin e sotëm afër Fushë-Kosovës.
Sipas fotografive që kanë ardhur në adresën e Kohës, shihet se në aksident përveç dy veturave dhe një kamionete, është i përfshirë edhe një autobus.
Ende nuk dihet nëse ka të lënduar, porse dëme materiale shihet të ketë.
Ndërkaq nga Policia është bërë e ditur se aksidenti ka ndodhur rreth orës 09:20 në fshatin Vragoli.
“Informacionet e para flasin për përfshirjen e tri automjeteve në këtë aksident. Deri më tani nuk raportohet për të lënduar. Policia e trafikut ka dalë në vendin e ngjarjes dhe ka nisur punën për hetimin e shkaqeve të këtij aksidenti”, thuhet në njoftim.
