Tre zyrtarë policorë të Stacionit Policor të Gjakovës janë arrestuar të enjten nën dyshimin për keqtrajtim të një personi, të arrestuar sot për kundërvajtje në trafik, ka njoftuar Inspektorati Policor i Kosovës.
IPK-ja ka rekomanduar suspendimin edhe të katër zyrtarëve të tjerë policorë.
Sipas njoftimit për media, rasti kishte ndodhur në orët e hershme të mëngjesit. Ankuesi ishte dërguar për trajtim mjekësor nga policia, si pasojë e lëndimeve që dyshohet të kenë ardhur nga përdorimi i forcës nga policët.
Ndaj të arrestuarve është caktuar masa e ndalimit prej 48 orësh. Ata po ashtu janë suspenduar nga detyra.
