Kronikë

Ndalohen 20 persona që nuk respektuan masat gjatë pandemisë

Foto: Alban Bujari / KOHA

Policia e Kosovës ka vazhduar të marrë masa ndaj personave të cilët nuk i kanë respektuar masat e ndalimit gjatë kohës së pandemisë.

Siç bëhet e ditur nga raporti 24-orësh, të premten janë ndaluar 20 persona në nëntë raste të ndryshme.

Vetëm në Pejë, Policia ka ndaluar 11 persona pasi janë gjetur në një lokal, përkundër ndalesës së Qeverisë për punë të kafe-bareve dhe restoranteve. Në Mitrovicën e Jugut janë ndaluar tre persona në tri raste të ndryshme. Në Gjilan Policia ka ndaluar dy persona në një rast, ndërkaq në Prishtinë, Gjakovë e Ferizaj janë ndaluar nga një person në nga një rast.

Nga e hëna do të nis faza e dytë e lehtësimit të masave. Sipas njoftimit nga ministri në detyrë i Shëndetësisë, Arben Vitia, orari i qarkullimit do të zgjatet deri në 4 orë në ditë.

Gjithashtu është planifikuar edhe hapja e disa sektorëve.

Nga e hëna do të rihapen këto biznese: floktarët dhe sallonet e ondulimit, stomatologët dhe fizioterapeutët, tregtarët me pakicë dhe tregu i gjelbër, gastronomia, pra varianti ‘merre me vete’, transporti hekurudhor, transporti urban dhe ndërurban me leje të veçanta, qendrat e thirrjeve telefonike me lista të stafit esencial, si dhe galeritë dhe muzetë.