Projektbuxheti i Komunës së Podujevës për vitin 2024 ka përplasur pushtetin e opozitën në seancën e mbajtur të mërkurën. Shefi i Grupit të këshilltarëe të LDK-së, Valon Demolli, ka thënë se nëse i sheh si numra, buxheti ta krijon një përshtypje të gabuar sikur ka rritje reale.
“Por në realitet krejt çka është rritur është mashtrimi dhe manipulimi me shifra. Kur analizohet nëpër kategori buxhetore shihet se është një buxhet konsumues duke rritur shpenzimet operative e duke zvogëluar investimet kapitale. E që do të duhej të ishte e kundërta, të rriteshin kapitalet e të zvogëloheshin mallrat. Ky buxhet është diskriminues, pasi nuk përfshin gjithë territorin e Podujevës dhe qytetarët e saj”, është shprehur Valon Demolli.
Sipas tij, ky buxhet nuk garanton zhvillim ekonomik.
“E çka është më e rëndësishme të ceket përsëri nuk po merren parasysh rekomandimet e Auditorit. Në këtë buxhet është dashtë të përfshihen nevoja dhe kërkesat e gjithë qytetarëve të dala nga dëgjimet publike me qytetarë e jo të ndalet publikimi i tyre ku qytetarët ua përplasën në fytyrë të bërat e juaja. Shembuj diskriminimi mund të gjenden në të gjithë projektbuxhetin e vitit 2024. E kemi rastin e fshatit Gllamnik me afro 4 mijë banorë e ndahen 31 mijë e 500 euro. Kurse Repa një ndër fshatrat më të vogla 44 mijë e 620 euro”, ka theksuar Demolli.
Ai ka thënës e ka një kërkesë të banorëve të fshatit Dyz të dorëzuar në komunë, të cilët kërkojnë nga komuna shtrimin e një trotuari në gjatësi 2 km, në rrugën kryesore, pasi mungesa e trotuarit rrezikon nxënësit në atë shkollë.
“Në këtë buxhet veç nevojat dhe kërkesat e qytetarëve nuk janë përfshirë, por jeni kujdesur që investimet t’i dërgoni tek aktivistët dhe votuesit tuaj. Keni nënshkruar kontrata me mungesë financiare siç është rasti i rrugës ‘Xhemajl Mustafa’ prej 1.3 milionë eurosh. Rruga lidhëse ‘Vëllezërit Frashërit’ viti i tretë që planifikohet buxhet e ende shpallje të tenderit nuk ka. Ndërtimi i Shtëpisë së Kulturës parapara Qendrës së Kulturës qe 3 vjet planifikim nga 100 mijë euro e projketi kurrkund e mjetet po i harxhoni diku tjetër”, ka thënë ai.
Si LDK ka thënë se nuk e mbështesin një buxhet, siç e ka quajtur ai, diskriminues dhe që nuk garanton zhvillim ekonomik.
Vërejtje për projektbuxhetin e vitit 2024 kanë dhënë edhe këshilltarë tjerë të LDK-së për mosinvestimin në zjerimin e shtretërve të lumenjve, nënshkrimin e kontratave pa zotim të mjeteve, mosinvestim në rrjetin e ujësjellësit, etj.
Ndërsa shefi i Grupit të këshilltarëve të LVV-së, Haki Rudari, ka thënë se projektbuxheti i përfshin kërkesat e banorëve të Komunës.
“Në këtë buxhet kemi impelementimin e kërkesave të banorëve nëpër të gjitha fshatrat dhe lagjet e komunës tonë, pa dallime politike, racore, nacionale, etj. Ka pasur edhe dëgjime me qytetarë dhe kërkesta që ata i kanë bërë sigurisht që janë inkorporuar në këtë buxhet. Ne secilën drejtori ka projekte që janë për qytetarin”, ka thënë Haki Rudari.
Ai e ka përmendur edhe projektin e shkollës në Shajkofc që është paraparë të ndërtohet, e që është fshat nga vjen edhe ai. Sipas tij, nuk është shkollë ku shkojnë vetëm të një sukbjeti politik por është për të gjithë fëmijët e kësaj pjese.
Ndërsa, shefi i Grupit të këshilltarëve të PDK-së, Bashkim Syla, ka thënë se i kanë disa vërejtje rreth këtij projekt-buxheti.
“Vërejtja e parë është mosspecifikimi i projekteve. Është viti i tretë që planifikohen mjete për rrugën nga magjistralja deri te rruga ‘Vëllezërit Frashëri’. Kam prit që investimet do të jenë më të mëdha në arsim dhe shëndetësi. Në Gllmanik fatkeqësisht nuk është planifikuar çerdhja. Kam pritur rritje për 100 mijë euro më shumë në bujqësi. Në këtë buxhet ka edhe projekte të mira siç është zona indusktriale, zgjerimi i 3 rrugëve në qytet. Ne nuk jemi ta bllokojmë këtë projektbuxhet”, ka thënë ai.
E këshilltarja nga radhët e AAK-së, Mrikë Thaçi ka kërkuar që për bartjen e nxënësve me nevoja të veçanta të specifikohet një nënlinjë e veçantë në kuadër të Drejtorisë së Arsimit te kodi i shërbimit kontraktues me specifikim të veçantë shërbime të transportin në relacion shtëpi-shkollë dhe anasjelltas për këtë kategori.
Drejtori për Shërbime Publike, Mbrojtje dhe Shpëtim, Bahri Selimi, ka thënë se për shtretërit e lumenjve ka rritje të buxhetit nga 40 në 140 mijë për vitin 2024. Kurse, drejtori për Buxhet dhe Financa, Fatlum Osmani, ka thënë se ky projektbuxhet dhe projeksionet për vitete 2025-2026 janë në bazë të qarkores buxhetore.
“Sa i përket rritjes së mjeteve buxhetore në kategrinë e pagave, hyrja në fuqi e Ligjit të pagave ka ndikuar në rritjen e buxhetit për paga. Kemi rritje të buxhetit për mallra, por kemi një rritje të çmimeve dhe mallrat që janë të domsdoshme që të mbulohen, si në shëndetësi, arsim, etj. Kemi një zvogëlim të kapitaleve në shëndetësi, pasi objekte shëndetësore pothuajse janë kryer. U cek se nuk është buxhet zhvillimor, po unë besoj që prioritetet e zhvillimit që duhet të jenë është arsimi, është shëndetësia edhe është ekonomia. Në të gjithë këta sektorë kemi rritje shumë të madhe të buxhetit nga vitet e kaluara”, ka thënë ai.
Sa i përket mosinvestimit në rrjetin e ujësjellësit, drejtori Osmani ka thënë se është kërkesë e nivelit qendror që të mos investojmë në rrjet, pasi kjo është përgjegjësi e kompanisë rajonale.
Projektbuxheti për vitin 2024 që është miratuar me shumicë votash kap vlerën e 31 milionëe 43 mijë e 19 euro. Mbi 16 milionë janë në kategorinë e pagave dhe mëditeve, 3 milionë e 585 mijë e 500 euro janë në kategorinë e mallrave dhe shërbimeve, 513 mijë euro për shpenzime komunale, subvencione dhe transfere 1 milionë e 670 mijë euro dhe shpenzime kapitale 8 milionë e 756 mijë e 230 euro.
© KOHA. Të gjitha të drejtat janë të rezervuara.
