Banorët e fshatit Gllamnik të Podujevës po kërkojnë nga Ministria e Mjedisit, Planifikimit Hapësinor dhe Infrastrukturës që të mos e ndryshojë lokacionin për ndërtimin e një rrethrrotullimi në magjistralen Podujevë-Prishtinë. Ata thonë se vendi ku ka qenë i planifikuar për këtë rrethrrotullim i lidh disa fshatra, kurse nëse i ndërrohet lokacioni, sipas tyre, nuk lidh asgjë, pos një biznesi privat. Zyrtarët e Ministrisë nuk u janë përgjigjur pyetjeve të KOHËS
Të shqetësuar janë shprehur banorët e fshatit Gllmanik të Podujevës për shkak të ndërrimit të lokacionit për ndërtimin e një rrethrrotullimi në magjistralen Podujevë-Prishtinë nga Ministria e Mjedisit, Planifikimit Hapësinor dhe Infrastrukturës. Ata po kërkojnë që ky rrethrrotullim të ndërtohet siç ishte paraparë fillimisht në udhëkryqin e këtij fshati që lidh edhe fshatrat Sfeçël e Dumosh. Vendi ku, sipas banorëve, pritet të ndërtohet ky rrethrrotullim afër shkollës po bëhet për shkak të një biznesi privat.
“Fillimisht rrethrrotullimi në bazë të kontratës, të cilën e kanë bërë Ministria, është i caktuar këtu ku është qendra e Gllmanikut, ku gravitojnë shumë fshatra të tjera, të cilat lidhen, është fshati Dumosh, fshati Sfveçël, lagjja e Kosumajve dhe lagjet e tjera, të cilat kanë qasje për vajtje dhe shkuarje në shkollë edhe në punë. Njëkohësisht edhe pjesa tjetër e Gllamnikut, e cila është në anën e epërme”, ka thënë përfaqësuesi i fshatit Gllamnik, Osman Bahtiri.
Sipas tij, Ministria kishte tentuar t’i fillojë punimet e këtij rrethrrotullimi në afërsi të shkollës së fshatit, por pas kundërshtimit të banorëve punimet janë ndalur. Bahtiri ka theksuar se e kanë dërguar në Ministri dhe Komunë të Podujevës një peticion me 345 nënshkrime të banorëve, nëpërmjet të cilit kanë kërkuar që rrethrrotullimi të ndërtohet, siç e quan ai, në qendër të fshatit.
“Nëse nuk kryhet rrethrrotullimi këtu, i cili ka qenë i paraparë në bazë të dokumenteve të tyre, atëherë është problem për ne banorët. Krejt bashkëfshatarët i kemi pronat në të dyja anët e rrugës, duhet të shkojmë në Sibofc për të dalë këtu në arë tonë, ose diku tjetër, kur është mundësia të lidhen këtu dhe është e mirë për të gjithë. Le të bëhen edhe rrethtrrotullime të tjera, neve nuk na pengojnë, por këtu është qendra e shumicës së njerëzve”, ka theksuar përfaqësuesi i fshatit. “Atje nuk lidh askënd, atje lidh veç biznes privat. Absolutisht nuk lidh asgjë. As nuk ka udhëkryq, e këtu është udhëkryqi që gravitojnë të gjithë banorët që shkojnë në punë e shkollë, prej Dumoshi e Sfeçle. E tjetër kund, kudo që bëhet është i mirë, po pa u bë këtu, nuk do ta lejojmë aq lehtë. Po flas në bazë të peticionit të banorëve të Gllamnikut”.
Edhe Muharrem Bajrami nga ky fshat, i cili e bën edhe bartjen e nxënësve në shkollë, thotë se vendi më i përshtatshëm për rrethrrotullim është te ky udhëkryq.
“Ku e kanë vendosur së pari aty është funksional, se këtu lidhen katër fshatra në këtë rrugë, ku ka qenë përpara me plan, me atë rregulloren të vendoset rrethi, këtu për të mirën e të gjithëve”, është shprehur ai.
Edhe Selman Bahtiri ka argumentuar njësoj.
“Këtu i kanë bërë edhe matjet, i kanë bërë përcaktimet... Tash çka u bë, çka po duan të ndryshojnë, nuk e dimë. Por, këtu është vendi më ideal edhe sa u përket shpronësimeve edhe sa u përket të gjitha punëve, këtu del më lirë”, ka thënë ai.
KOHA ka dërguar pyetje në adresë të Ministrisë së Mjedisit, Planifikimit Hapësinor dhe Infrastrukturës më 31 maj, por nuk ka marrë përgjigje.
Ndërkohë, banorët kanë thënë se nëse nuk do të ndërtohet rrethrrotullimi në udhëkryqin e fshatit, atëherë do të marrin masa deri në bllokim të rrugës.
