Reshjet e shiut shkaktuan vërshime në Penuhë të Podujevës
Reshjet e dendura të shiut kanë shkaktuar vërshime në një shtëpi në fshatin Penuhë të Podujevës, të enjten. Zëdhënësi i Komunës së Podujevës, Fatri Zhitia, ka thënë se Brigada e Zjarrfikësve ka intervenuar për ta larguar ujin nga shtëpia.
“Reshjet e shpeshta dhe të dendura të shiut kanë shkaktuar vërshime në fshatin Penuhë dhe në magjistralen Podujevë-Prishtinë, ku është grumbulluar uji dhe ka shkaktuar vështirësi në qarkullim të automjeteve. Gjithashtu një shtëpi është përfshirë nga vërshimet në Penuhë, në të cilën janë shkaktuar dëme në orenditë e shtëpisë, ku edhe mbrëmjen e kaluar Brigada e Zjarrfikësve ka intervenuar për të larguar ujin e grumbulluar në këtë shtëpi”, ka thënë Fatri Zhitia.
Pronari i shtëpisë, Kushtrim Feta, i ka thënë KOHËS se uji ka depërtuar brenda shtëpisë dhe ka shkaktuar disa dëme.
“Kur ka reshje shumë uji, po mblidhet nga dy anët e rrugës edhe po ka vërshime. Uji ka hyrë edhe brenda, janë shkaktuar pak dëme. Komuna edhe zjarrfikësit kanë intervenuar për ta larguar ujin”, ka thënë ai.
Zëdhënësi i Komunës së Podujevës ka thënë se gjatë ditës së sotme situata ka qenë stabile.
“Komisioni komunal për fatkeqësi natyrore ka pranuar disa ankesa nga ana e qytetarëve për rrugët që janë përfshirë nga vërshimet dhe janë ngritur kapacitetet e nevojshme në rast të përkeqësimit të motit për të intervenuar aty ku ka nevojë”, ka thënë Zhitia.
