Komunarët e Graçanicës nuk i kanë përcaktuar standardet e cilësisë në disa tenderë gjatë vitit 2022. Specifikat teknike në këto aktivitete të prokurimit, ata i kanë bërë me përshkrime jo të sakta dhe jo të matshme.
Këto gjetje janë evidentuar në raportin e Zyrës Kombëtare të Auditimit (ZKA) që flet për specifkim teknik jo të qartë/matshëm.
“Rregullimi i shtratit të lumit Graçanka, Komuna kishte lidhur kontratë me vlerë prej 177,531€, në formulimin e specifikave teknike ishin bërë përshkrime jo të sakta dhe jo të matshëm të pozicioneve si: nuk ka përcaktuar standardin e cilësisë së punimeve apo produkteve të kërkuara, duke kërkuar vetëm Beton c-30/37”, thekson raporti i Auditorit.
Bazuar në këtë dokument, edhe në ndërtimin e rrugëve në Kishnicë, Sushicë dhe në vendbanimin e romëve në Graçanicë, në vlerë prej 131,721€, në formulimin e specifikave teknike ishin bërë përshkrime jo të sakta dhe jo të matshëm të pozicioneve si: nuk ka përcaktuar standardin e cilësisë së punimeve apo produkteve të kërkuara, duke kërkuar, sipas ZKA-së, vetëm furnizimi, bartja, shtrirja dhe ngjeshja e asfalt betonit AB0-16mm.
“Por, pa u përcaktuar standardi i asfaltit, pa përcaktuar metodë testimi për matjen e temperaturës së përzierjeve të nxehta bituminoze pas përzierjes dhe gjatë ruajtjes, transportit dhe shtrimit”, shkruhet në raport. “Furnizim me material ndërtimor për nevojat e Komunës së Graçanicës, në vlerë të parashikuar 600,000€, në formulimin e specifikimit teknik, në dy raste ka përsëritje të pozicioneve si stiropol 2cm dhe ngjitës për pllaka të qeramikës. Në të dy rastet është dhënë çmim i ndryshëm për produktin e njëjtë, çka ka ndikuar që të çorientohet konkurrenca”.
Për më tepër, Auditori thekson se ka përshkime të pamatshme apo të paqarta, ku në tetë pozicione nuk ishte përcaktuar numri i xhamave për dritaret që kërkoheshin apo nuk është përcaktuar numri i dhomave termike për dritare dhe nuk është përcaktuar gjerësia e profilit të dritareve.
“Po ashtu, nuk është përcaktuar numri i dhomave termike (geter apo gjysmë geter) për bllokat nga argjila. Specifikimet teknike jo të qarta/matshme, kanë ndodhur për shkak se njësitë kërkuese nuk kanë bërë rishikim adekuat dhe në mënyrë profesionale, për të eliminuar paqartësitë, dhe zyrtari përgjegjës i prokurimit nuk ka ushtruar kontrolle të mjaftueshme për të parandaluar këtë mangësi”, thekson raporti i Zyrës Kombëtare të Auditimit.
KOHA ka dërguar pyetje në adresë të Komunës së Graçanicës që nga 30 maji, por ende nuk ka marrë përgjigje. Ndërkohë, në raportin e Zyrës Kombëtare të Auditimit shkruan se menaxhmeti i komunës është pajtuar rreth këtyre gjetjeve.
© KOHA. Të gjitha të drejtat janë të rezervuara.
