Komunarët e Podujevë do ta nisin procesin e zgjedhjes së këshillave të fshatrave dhe lagjeve urbane nga kjo javë.
Por, përfaqësues të shoqërisë civile shohin disa sfida në këtë proces.
Drejtori ekzekutiv i rrjetit të OJQ-ve lokale “Demokracia Fillon Këtu”, Shemsi Jashari, e sheh sfiduese pjesëmarrjen e gjinisë femërore në këtë proces.
“Për disa vite radhazi si shoqëri civile kemi avokuar për të shtyrë përpara zgjedhjen e këshillave të fshatrave dhe lagjeve dhe tashmë fillimi i procesit për përzgjedhje është inkurajues edhe pse i vonuar. Ajo që na brengosë është fakti se sa mirë dhe me qasje të fokusuar do të bëhet informimi i qytetarëve me procesin dhe a do të arrihen standardet e kërkuara sipas udhëzimit me përfaqësim gjinor”, ka theksuar Shemsi Jashari.
Ai ka thënë se shohin edhe sfida që mund ta pengojnë procesin.
“Tendenca për politizimin e procesit, mungesa e pjesëmarrjes së grave dhe kategorive të cenuara, dhe mospajtimet e banorëve me përfshirjen e disa fshatrave në një këshill lokal. Problemi tjetër që shohim ne është mungesa e përvojës për këtë proces nga zyrtarët përgjegjës komunalë dhe anëtarët e komisionit nga kuvendi, mungesa e buxhetit për komisionin komunal. Sido që të jetë ne si organizatë do t’i monitorojmë dhe do të mbajmë transparent këtë proces edhe pse jemi përjashtuar nga komisioni nga partitë në pushtet”, ka thënë ai.
Në anën tjetër, zëdhënësi i Komunës së Podujevës, Fatri Zhitia, ka thënë se bazuar në nenin 34 të Ligjit për vetëqeverisje lokale nr. 03/L-040, nenin 29 të Statutit të Komunës nr. 01/020/01-0050862, të datës 29 qershor 2018, neni 4 të Udhëzimit Administrativ nr. 02/2019 për organizimin, funksionimin dhe bashkëpunimin e komunave me fshatrat, vendbanimet dhe lagjet urbane, Komuna e Podujevës fillon procesin e zgjedhjes së kryetarëve të këshillave të fshatrave, vendbanimeve dhe lagjeve urbane gjatë muajit qershor 2023.
“Procesi do të fillojë në katër këshilla lokale. Takimi i parë do të mbahet të premten më 09.06.2023, në Shkollën Fillore të Mesme të Ulët ‘Shefki Latifi’ për fshatrat Murgullë, Tërrnavicë, Reçicë, Sllatinë, Brecë, Dvorishtë, Pollatë, Potok dhe Zhiti, duke filluar nga ora 18:00. Takimi i dytë do të mbahet më 12.06.2023 (e hënë), në Shkollën Fillore të Mesme të Ulët ‘Hamit Sejdiu’ për fshatrat; Sylevicë, Pakashticë e Epërme, Revuçë, Pakashticë e Poshtme, duke filluar nga ora 18:00”, ka thënë Fatri Zhitia.
Sipas tij, takimi i tretë do të mbahet më 14.06.2023, (e mërkurë) në Shkollën Fillore e Mesme e Ulët “Hamit Sejdiu” për fshatrat Kërpimeh, Metehi dhe Repë, duke filluar nga ora 18:00 dhe takimi i katërt do të mbahet më 16.06.2023, (e premte) në Shkollën Fillore të Mesme të Ulët “Jetullah Gashi” për fshatrat; Dobërdol dhe Zakut, duke filluar nga ora 18:00.
“Tubimet tjera publike me qytetarë për përzgjedhjen e këshillave të fshatrave, vendbanimeve dhe lagjeve urbane në territorin e Komunës së Podujevës do të bëjmë njoftimet publike në uebfaqen zyrtare të komunës dhe do t’i informojmë qytetarët në forma të ndryshme si në televizionin lokal, radiot lokale dhe forma të tjera. Kjo do të bëhet me qëllimin e vetëm që të gjithë qytetarët të informohen, por edhe pjesëmarrja e qytetarëve në vendimmarrje të rritet”, ka thënë ai.
© KOHA. Të gjitha të drejtat janë të rezervuara.
