Sipas DFK-së, kuvendarët në Podujevë nuk po e arsyetojnë rritjen e pagave
Rrjeti i OJQ-ve lokale “Demokracia Fillon Këtu” e ka vlerësuar si të dobët punën e Kuvendi Komunal të Podujevës gjatë vitit 2022. Nga monitorimi njëvjeçar, sipas përfaqësuesve të kësaj organizate, asamblistët e kësaj komune nuk e kanë arsyetuar mandatin që kanë. Shemsi Jashari ka theksuar se edhe në muajin që shkoi performanca e këshilltarëve komunalë ishte e njëjtë dhe se nuk po e arsyetojnë as rritjen e pagave. E këshilltarët komunalë nuk i kanë komentuar këto deklarata.
Notë të dobët i ka dhënë Kuvendit Komunal të Podujevës rrjeti i OJQ-ve lokale “Demokracia Fillon Këtu”.
Drejtori ekzekutiv i kësaj organizate, Shemsi Jashari, ka thënë se nga monitorimi i punës dymbëdhjetëmujore në 2022 del që kuvendarët e kësaj komune nuk e arsyetojnë mandatin që kanë.
“Raporti ka matur numrin e diskutimeve në Kuvend për nga sasia jo për nga kualiteti për shkak të kohës dhe mundësisë. Por ajo që kemi vërejtur është se nuk vërehet një dallim mes vitit 2021 dhe vitit 2022 e performancës së Kuvendit, por edhe vitit 2020 qysh para pamdemisë, që është një performancë jo e kënaqshme, është një nivel i njëjtë që shkon në Asamblenë Komunale, janë diskutime sipërfaqësore për tema të rëndësishme, nuk ka diskutim dhe debat shterues”, ka thënë Jashari.
Për Hartën Zonale, të cilin Jashari e ka quajtur si dokumentin më të rëndësishëm, ka thënë se është diskutuar vetëm 13 minuta e që, sipas tij, nuk do të duhej të mjaftonte një ditë e tërë.
Edhe për diskutimet që bëhen, Jashari thotë se janë më shumë sipërfaqësore dhe kuvendarët opozitarë nuk japin ndonjë alternativë ndryshe që do ta sfidonte pushtetin në Podujevë.
Madje, sipas tij, asamblistët në përgjithësi nuk e arsyetojnë as rritjen e pagave.
“Do të thotë edhe për këtë vit është i njëjtë për këto seanca çka janë mbajtë në vitin 2023, është performanca e njëjtë duke shkua. Nuk vërehet ndonjë ndryshim, edhe pse pagat e tyre në vitin 2023 përmes ligjit janë tashmë dinjitoze për aktivitetin që ata e bëjnë. Janë diku rreth 600 euro me Ligjin e ri të pagave dhe nëse ka qenë një indikator, një shkaktar pse performanca e tyre për vitet e kaluara, ka qenë paga e ulët dhe jo e dinjitetsme, të paktën për vitin 2023 nuk kanë arsye”, ka shtuar Jashari.
KOHA ka kontaktuar këshilltarë komunalë nga radhët e partisë opozitare LDK, por ata nuk kanë dashur të komentojnë deklaratat e përfaqësuesit të shoqërisë civile.
Edhe kryesuesi i Kuvendit Komunal, Hilmi Hoxha, që vjen nga radhët e PDK-së, nuk ka dashur të prononcohet.
Ndërkohë, shefi i Grupit të këshilltarëve të LVV-së, Haki Rudari, për ditë të tëra ka qenë i paqasshëm.
Jashari thotë se një nga arsyet e performancës së dobët të kuvendarëve është edhe lidershipi i dobët i partive politike në këtë komunë.
