Opozita në Lipjan ia kërkon komunës listën e përfituesve të subvencioneve dhe pajisjeve bujqësore
Asamblistët e Partisë Demokratike të Kosovës (PDK) në Lipjan, të mërkurën, kanë deponuar një kërkesë për qasje në dokumente zyrtare në këtë Komunë, për të kërkuar listën e personave përfitues të subvencioneve.
Anëtarët e partisë që është në opozitë, po ashtu ata kanë kërkuar edhe listën e personave që kanë përfituar makineri dhe pajisje të tjera nga Komuna gjatë vitit 2022.
Sipas tyre Komuna duhet t’ua sigurojë komplet dosjet dhe kriteret e përfituesve të parasë publike. Në shkresën e këtij subjekti thuhet se kërkesa është e bazuar në Ligjin për qasje në dokumente publike, për të kërkuar listën e pagesave për përfituesit individual.
“Kërkojmë qasje në listën e pagesave për përfituesit individual te shpenzimi i buxhetit sipas kodeve ekonomike për periudhën janar-dhjetor 2022 në Komunën e Lipjanit. Ne kërkojmë të pajisemi në formë fizike dhe elektronike me listën e pagesave për përfituesit individual me këto të dhëna: Emri dhe mbiemri i përfituesit, vendbanimi, qëllimi i pagesës për secilin përfitues dhe shuma e mjeteve financiare që janë ndarë për secilin përfitues”, thuhet në kërkesën e kuvendarëve.
Arsim Jashari, shef i grupit të asamblistëve të PDK-së, ka thënë se opozita ka të drejtë të dyshoi se përfitues ka individ dhe simpatizant të partisë në pushtet.
“Kemi deponuar si grup i PDK-së, kërkesën për qasje në dokumente publike, lidhje me pagesat për përfituesit individualë. Ne dëshirojmë të dimë se cilat kritere janë duke u përdorur për këto financime dhe kush janë përfituesit. Në kemi dyshimet tona se shumica e këtyre përfituesve janë votues ose anëtarë të partisë në pushtet. Qytetarët kanë të drejt ne transparencë dhe të dimë se si po shpenzohen parat e taksapaguesve”, ka thënë Jashari.
Në anën tjetër Hyra Bytyqi, zëdhënës e Komunës së Lipjanit, nuk u është përgjigjur pyetjeve të KOHES lidhur me këtë çështje.
