Arbëri

LDK-ja akuzon Komunën e Podujevës për keqpërdorime në një projekt rrugor

Akuza të shumta ka bërë partia opozitare, Lidhja Demokratike e Kosovës, ndaj qeverisë komunale të Vetëvendosjes në Podujevë rreth një projekti rrugor në këtë komunë. Asamblisti i LDK-së, Ekrem Rrahmani, ka thënë se pushteti lokal i ka dhënë tender prej 100 mijë eurove një kompanie pa bërë asnjë punë në rrugën “Skënderbeu”.

Sipas tij, në këtë kontratë për punë shtesë që është bërë në dhjetorin e vitit të kaluar do të duhej të hiqej një sasi e madhe dheu, të vendosej zhavorr dhe nëntë kapakë të pusetave, që LDK-ja pretendon se asnjëra prej tyre nuk është bërë.

“Shpallja publike ‘Rikonstruimi i rrugës ‘Skënderbeu’-punë shtesë u bë më 21.12.2022. Po atë ditë është fituar tenderi, e ka nënshkruar kontratën dhe atë ditë i ka marrë paratë. Në specifikim teknik shkruan punë shtesë 13 mijë e 455 kubikë dhe me i heq diku 1340 kamionë me dhe, me i çu diku deri në 14 km larg që i bjen me ba një kodër me dhe. Nuk e ka hequr asnjë. Edhe t’i shtrosh mijë kubikë shodër (zhavorr v.j.). Nuk u shtrua asnjë. Edhe 9 kapak të shaktave (pusetave v.j.)”, ka thënë Ekrem Rrahmani në mbledhjen e fundit të Kuvendit Komunal.

“Do të thotë 98 mijë euro, me i ble ata 9 kapakë, me pru atë shodër edhe me heq atë dhe. E kisha vetë drejtorin ku e ka çu gjithë atë (operatori ekonomik v.j.)? Nnëse thua e ka heq, qysh e ka heq për 1 ditë?”, ka pyetur Rrahmani.

Ndërkohë, drejtori për Planifikim Urban dhe Mbrojtje të Mjedisit, Leutrim Krasniqi, e ka mohuar se nuk janë kryer punët, por për këtë ka thënë se ka qenë mbikëqyrësi i projektit që e ka bërë vlerësimin.

“Sa i përket pyetjes rreth punëve shtesë në rrugën ‘Skënderbeu’. Për këtë kontratë është përcaktuar edhe vlera e lidhjes së kontratës gjatë muajit qershor që është 1.3 milionë euro. Gjatë lidhjes së kontratës nuk ka qenë e paraparë gërmimi. Gjatë ekzekutimit të punëve është parë që është e nvojshme gërmimi dhe depozitimi i materialit të zhavorrit, duke filluar prej materialit 150, 60 e kështu me radhë. Për mos me shkua me asfaltim në njëfarë forme vetëm me punua edhe me krye, ne e kemi parë të nevojshme në intervenimin edhe në futjen e kësaj pjese në kuadër të punëve shtesë”, është shprehur Leutrim Krasniqi.

Sipas tij, në bazë të vlerësimit kompania nuk e ka gërmuar në tërësi rrugës.

“Aty ku ka pas nevojë është bërë gërmimi. Vlerësimi është bërë nga komisioni përkatës i Drejtorisë duke dalë me matje përkatëse për të gjitha punët të cilat i ka krye. Kurse pjesa tjetër sa i përket lidhjes së kontratës ndoshta do të ishte ma mirë me u konsultua me prokurimin se këto procedura nuk janë në kompetencë të Drejtorisë së Urbanizmit”, ka thënë ai.

Por, asamblisti i LDK-së ka insistuar se punët aty për këtë kontratë - punë shtesë - nuk janë kryer.

“Una ia kallxova datat kur u shpallë më 21 dhjetor, po atë ditë e ka nënshkruar kontratën dhe nuk është anekskontratë siç tha drejtori po është kontratë e re, që s’ka të drejtë me ba kontratë të re deri në 2 vjet prej atë ditë që përfundon komplet ajo rrugë. Atë ditë i ka marrë edhe paratë ai, atë ditë ka pas me i bartë 13 mijë e 455 kubikë dhe, që i bie 1400 kamionë dhe. 1400 kamionë dhe me i heq prej aty bëhet tunel, s’ki ku e vendos asfaltin ma hiç. Kodër, se 1400 kamionë, le të më kallxon ky në cilën deponi e ka çua atë dhe, jo 1400 po as 14 kamionë nuk janë heq prej aty”, ka vazhduar Ekrem Rrahmani.

“9 kapakë ka pas me i ble me 100 mijë euro - punë shtesë - me heq atë dhe edhe me shtruar shodër, asnjë kamionë dhe nuk e ka hheq, asnjë kapak s’e ka ble, kapakët kanë kushtuar 1000 e 80 euro, 77 mijë euro e ka qit me i heq dhe. Edhe drejtor tregona a ka kapërcyer afati se i ke pas 220 ditë, sa ditë janë bërë për me përfundua ai projekt? Edhe pse janë çelë gropat pasi është shtruar?”, vijoi asamblisti i LDK-së.

Drejtori Krasniqi e ka përsëritur se ekpertët e komunës e kanë bërë vlerësimin rreth kryerjes së këtyre punëve.

“Ndoshta ish kanë mirë edhe ty me të marrë në kuadër të komisionit për me ba vlerësimin e sasisë. Janë kanë ekspertët kompetentë të cilët e kanë vlerësuar sa është sasia, sa duhet me i heq material, sa duhet me u vendos material. Procesi i vendosjes ose deponia, janë më saktë menaxheri dhe mbikëqyrësi ata të cilët e bëjnë këtë punë dhe janë kompetentë për këtë”, ka thënë Krasniqi.

“Për gropat, mund të ketë ndonjë rast që kompania të ketë ndonjë ditë të mos punojë, mirëpo kjo gjithsesi është bendapërbrenda kontratës edhe për çdo rast eventual të ndonjë grope të caktuar, ato do të sanohen edhe do të vendoset pjesa tjetër shtesë e asfaltit, e cila edhe do të jetë përfundimtare. Gjithsesi ne do të mundohemi dhe do të punojmë që cilësia të jetë në nivelin e kënaqshëm”, ka thënë ai.