Arbëri

Mbledhjet e ekzekutivit të Prizrenit hapen për mediat e OJQ-të

Takimet e kryetarit të Prizrenit, Shaqir Totaj, me drejtorët e tij tani e tutje do të jenë të hapura për mediat dhe shoqërinë civile. Këta të fundit prej kohësh kanë kërkuar transparencë të shtuar nga organet komunale. Zyrtarët komunalë njëkohësisht kanë premtuar se do të zbatohen edhe praktika të tjera të transparencës, në mënyrë që të përmirësohet performanca e Komunës

Kërkesa e kamotshme e monitoruesve nga radhët e organizatave joqeveritare për hapjen e mbledhjeve të qeverisë komunale të Prizrenit për mediat dhe shoqërinë civile është realizuar të martën.

Kryetari Shaqir Totaj ka mundësuar praninë e gazetarëve dhe monitoruesve në takimin që ka zhvilluar me drejtorët komunalë, në të cilin është raportuar për punët dhe telashet aktuale në secilin dikaster.

Zëdhënësja e Komunës, Jona Hoxhaj, ka bërë të ditur se kryetari do t’i takojë drejtorët çdo të marte dhe se këto mbledhje do të jenë të hapura për mediat dhe OJQ-të. Sipas saj, do të zbatohen edhe praktika të tjera për rritjen e transparencës, me qëllim të përmirësimit të performancës së Komunës së Prizrenit.

“Kjo mbledhja e drejtorëve do ta quajmë më shumë mbledhja raportuese javore, do të jetë mbledhje raportuese javore e drejtorëve dhe e kryetarit të Komunës te njëri-tjetri, po ashtu edhe te mediat dhe OJQ-të. Kjo është në funksion të rritjes së transparencës. Por, në të njëjtën kohë, siç e thamë me datën 26 qershor, ne do të kemi edhe një tjetër gjë, do të bëjmë raportimin 6-mujor para qytetarëve, do të kemi një takim me qytetarët, të gjitha këto po bëhen në funksion të rritjes së performancës”, ka thënë Hoxhaj.

Dy javë më parë, organizata joqeveritare “EC Ma Ndryshe” pati shprehur pakënaqësinë lidhur me pamundësinë e mediave, organizatave të shoqërisë civile dhe qytetarëve për të marrë pjesë në takimet e qeverisë lokale. Madje, pati konsideruar se mbyllja e tillë është pengesë direkte ndaj punës së këtyre akterëve, sidomos mediave, të cilët kanë për qëllim rritjen e informimit publik.

Eroll Shabani nga “EC Ma Ndryshe” të martën ka vlerësuar se hapja e takimeve të qeverisë lokale është hap i rëndësishëm sa u përket transparencës dhe respektimit të zotimeve të dhëna gjatë fushatës parazgjedhore.

"Sot Komuna e Prizrenit ka mbajtur Bordin e Drejtorëve. Është një hap drejt rritjes së transparencës që është duke e bërë Komuna e Prizrenit. Është një zotim, të cilin e ka dhënë kryetari i Komunës. Bordi i Drejtorëve është i pari që mbahet pas emërimit të ekzekutivit. Pra javën e kaluar ‘EC Ma Ndryshe’ ka reaguar lidhur me mungesën e këtyre takimeve, prandaj Komuna e Prizrenit ka vendosur që ta mbajë. Sot, besoj se ishte një takim mjaft produktiv, u cekën disa nga çështjet që kanë prioritet dhe janë të rëndësishme për Komunën e Prizrenit”, ka deklaruar Shabani.

Në mandatin e shkuar të qeverisjes në Prizren, mbledhjet e tilla janë zhvilluar prapa dyerve të mbyllura, gjë që pati ngjallur pakënaqësi te mediat dhe shoqëria civile.