Subjekti fitues në Podujevë mund të ketë telashe me numrat
Foto: KTV
Asnjë marrëveshje për koalicion nuk është bërë deri tash nga partia fituese në Komunën e Podujevës.
Lëvizja Vetëvendosje, fituese e balotazhit të 14 nëntorit, nuk e ka shumicën në Kuvendin Komunal. Nga 35 kështilltarë sa i ka ky kuvend, VV-ja i ka vetëm 13, ose 5 më pak se shumica e thjeshtë.
Edhe pse thotë se nuk kanë vija të kuqe me askënd, kryetari i rizgjedhur, Shpejtim Bulliqi, ka theksuar se ende nuk janë ulur të analizojnë se si do të veprojnë për ta bërë shumicën në Kuvend.
“Unë besoj që ditëve në vijim ne do të ulemi dhe do ta analizojmë edhe procesin si tërësi, edhe me siguri se do të marrim veprime konkrete për hapat e mëtutjeshëm në mënyrë që të sigurohet shumica në Asamble Komunale. Tashmë konstulacioni i forcave në Asamble Komunale dihet si është edhe unë besoj se duhet me pa se me cilët numra ne mund të arrijmë që ta bëjmë atë shumicën e thjeshtë dhe t’i shpiejmë projektet përpara”, ka deklaruar Bulliqi.
Bulliqi për herë të parë në këtë pozitë është zgjedhur nëntorin e vitit të kaluar, pas emërimit të Agim Veliut ministër në Qeverinë Kurti 1. As atëherë Vetëvendosje nuk e kishte shumicën në Kuvend. Për shkak të mungesës së numrave, ky subjekt ka dështuar ta miratojë buxhetin për vitin 2022.
Kryetari i sapozgjedhur beson që ky dokument do të miratohet pas konstituimit të Kuvendit të ri Komunal.
“Unë mendoj që mosmiratimi më tepër ka pasur karakter politik, për arsye se ka qenë fazë e fillimit gati të fushatës zgjedhore dhe çdonjëri subjekt politik ka dashtë pak ta nxjerrë veten në pah që është faktor brendapërbrenda Asamblesë Komunale. Unë besoj shumë që ky buxhet që është bërë, është prej buxheteve të mira dhe brenda atij buxheti mund të gjendet çdonjeri prej subjekteve politike”, theksoi ai.
Ai ka thënë se janë të gatshëm të marrin edhe propozime edhe nga subjektet opozitare në mënyrë që t’i hapin rrugë miratimit të buxhetit për vitin e ardhshëm.
Kuvendi Komunal i Podujevës përbëhet prej 35 ulëseve, prej të cilave 14 i takojnë LDK-së, 13 VV-së, 4 PDK-së, 3 AAK-së dhe 1 OBKD-së.
