Partia Shqiptare Demokristiane e Kosovës, dega në Gjakovë, ka dalë në mbështetje të Ardian Gjinit nga AAK-ja për kryetar të komunës së Gjakovës për raundin e dytë zgjedhor më 14 nëntor.
Kreu i demokristianëve të Gjakovës, Ferdinand Kolaj, ka njoftuar ditë më parë për KOHËN se ka marrë ofertë nga dy konkurrentët për garën e balotazhit, Ardian Gjini i AAK-së dhe Mimoza Kusari e LVV-së, ndërkaq këtë të enjte sipas njoftimit është marrë vendimi pas konsultave të gjera me bazën dhe qendrën e partisë që të mbështetet Gjini i AAK-së.
"Në mënyrë unanime kemi vendosur që ne si PSHDK të kemi marrëveshje me subjektin politik AAK. Ftojmë elektoratin tonë që të dielën ta mbështesin Gjinin për kryetar të komunës së Gjakovës. Na shkoftë mbarë!", thuhet në njoftimin publik.
Në raundin e parë të zgjedhjeve të mbajtura me 17 tetor, kandidati i PSHDK-së Ferdinand Kolaj u rendit i treti në garën për kryetar komune. Gjini ishte i pari, ndërsa Kusari-Lila e dyta.