Arbëri

Shtatë drejtorë të Komunës së Ferizajt të infektuar me COVID-19

Komuna e Ferizajt gjatë ditëve të fundit është rikthyer në vatër të virusit Covid-19. Gjatë testeve të fundit kanë rezultuar pozitivë shtatë drejtorë të ekzekutivit të kësaj komune. Po ashtu edhe tre zyrtarë komunalë kanë rezultuar pozitivë. Ndërkohë gjatë ditës së hënë, kryetari i kësaj komune Agim Aliu pas rezultateve të testeve ka dalë negativë.

Lajmin e ka konfirmuar për KOHËN drejtori i Shëndetësisë dhe Mirëqenies Sociale, Bekim Ademi.

“Pas testeve të bëra kemi shtatë drejtorë komunalë me Covid-19 dhe tre zyrtarë komunalë. Si komunë janë marrë të gjitha masat për izolim sipas IKSHPK-së”, ka thënë Ademi.

Ndërkohë në një komunikatë për media, zyra për informim ka njoftuar se gjatë ditës së hënë kanë rezultuar gjithsejtë 21 raste të reja me Covid-19 në territorin e komunës së Ferizajt.

“Nga njoftimi i IKSHPK-së lidhur me rastet e reja me COVID-19, bëhet e ditur se kemi edhe 21 raste të reja pozitive me këtë virus në Ferizaj. Gjithashtu, nga njoftimi i IKSHPK-së bëhet e ditur se kemi edhe 3 të shëruar që çon në 133 numrin e të shëruarve, kurse në 42 numrin e rasteve aktive me COVID-19 në Ferizaj”,thuhet në komunikatë.

Ndërkohë, kryetari i komunës Agim Aliu, përmes një postimi në “facebook”, të hënën ka thënë se i është nënshtruar testit për këtë virus bashkë me stafin dhe gjithë ekzekutivin.

“Nga rezultatet që pranova, doli se jam negativ në testin e virusit COVID-19, kurse për anëtarët tjerë të kabinetit tim, jemi në pritje të rezultateve. Ju lus, mos shpërfillni këtë virus, respektoni masat mbrojtëse, duke ruajtur kështu shëndetin tuaj e të familjes. Vazhdojmë, me punë të dobishme për Ferizajn e ferizajasit”, ka shkruar Aliu.