Tahir Berisha, fermer nga fshati Gjurgjevik i Madh i Klinës, posedon 20 lopë qumështore.
Ai ka edhe një pikë grumbullimi ku e dorëzojnë qumështin 15 bashkëfshatarë.
Të shtunën, në ditën eparë të izolimit të Komunës së Klinës, qumështoret që e marrin këtë produkt nga Berisha nuk kanë mundur të vinin në fshat.
Për pasojë, rreth 500 litra qumësht është detyruar t’ua kthejë bashkëfshatarëve e një pjesë edhe e ka asgjësuar, raporton KOHA
Por ky problem është zgjidhur nga e diela pas një bisede që Berisha ka pasur me Policinë e Kosovës.
Sipas këtij fermeri, nëse zgjat periudha e izolimit, sipërmarrësit sikurse ai do të kenë probleme me ushqim të kafshëve.
Në qytetin e Klinës edhe këtë të martë lëvizjet kanë qenë të pakëta. Në të gjitha hyrje-daljet e Komunës qëndrojnë patrulla të policisë.
Barnatoret janë të vetmet që funksionojnë, por asnjëra prej tyre nuk ofron maska e dezinfektues.
Qendra Kryesore e Mjekësisë Familjare në Klinë ka ngritur një tendë në oborr. Stafi ankohet se iu mungojnë kushtet elementare për punë.
Alban Palushi, doktor i mjekësisë familjare, thotë se mungojnë edhe maskat.
Sipas tij, pacientët me temperaturë mbi 38 gradë udhëzohen për në Spitalin Rajonal të Pejës, përderisa numri i atyre që kërkojnë ndihmë në QKMF ka rënë drastikisht nga dita e shtunë.
Deri më tash në Klinë vetëm një shtetase italiane ka rezultuar pozitive sa i përket testimit për virusin “Covid 19”.
-
Nga: Shaban Maxharraj
-
17 mars 2020 19:26
-
Shpërndaje në: