Një Deja Muuuu Pranveror

Nga Presidenca e Republikës së Kosovës njoftohemi se presidenti i Republikës së Kosovës, Shkëlqesia e Tij Enver Hoxhaj, është ftuar të marrë pjesë në samitin e radhës së vendeve të NATO-s, i cili do të mbahet në zyrat qendrore të kësaj organizate veri-atlantike në Bruksel, më 14 qershor 2021. Kosova si vend anëtar në këtë samit do ta prezantojë shtrirjen e sistemeve më të reja raketore me rreze të mesme veprimi – të përuruara me rastin e ditëlindjes së mbretit historik dhe të papërsëritshëm arbëror "Scanderbeg" – si dhe sistemin e raketave balistike "Liria ka Emër", me rreze të gjata veprimi. Shkëlqesia e Tij, z. Enver Hoxhaj, me këtë rast deklaroi se është nder i veçantë për të si president, por edhe për Kosovën si shtet, që të jenë pararojë e mbrojtjes së vlerave euro-atlantike

Nuk e di a ju ka ndodhur të koteni ashtu pasdite, ndoshta as për një orë të plotë, por ta bëni njëfarë gjumi aq të lezetshëm dhe përmbushës saqë kur të zgjoheni e ke atë ndjesinë e "panikut" se keni fjetur shumë gjatë dhe se ju ka ikur komplet mbrëmja e edhe mëngjesi i ditës që pason... Eh, këtë lloj deja-vu-je e përjetova unë dje pasdite.

Pas disa minutash, kur realiteti filloi të ma kaplonte logjikën, pata një ndjenjë të radhës: disi një çlirim shpirtëror. Nuk i kisha humbur as mbrëmjen e as mëngjesin e ditës së nesërme: koha për të cilën kujtesa më kishte tradhtuar kishte qenë diku rreth 45 minuta.

Zbrita poshtë në kuzhinë, e hapa frigoriferin dhe u freskova me një gotë ujë të ftohtë. Tashmë i isha kthyer realitetit dhe ajo ndjenja se më ishte vjedhur koha nga gjumi i "thellë" kishte kaluar.

U ngjita lart në dhomën time dhe – ashtu siç veproj prore – e hapa telefonin tim. Në linkun e Facebookut sapo kishin filluar lajmet në televizionin KTV.

"Shikues të nderuar, mirëmbrëma! Po e japim edicionin e lajmeve kryesore të ditës. Sot, në një takim pune në Bruksel, kryeministri i Republikës së Kosovës, zotëri Dardan Molliqaj, takoi komisionerin e BE-së për Zgjerim, Nigel Farage. Kryeministri Molliqaj theksoi se vendi ka arritur stabilitetin e institucioneve që garantojnë demokracinë, sundimin e ligjit, të drejtat e njeriut, respektimin dhe mbrojtjen e pakicave, ekzistencën e një ekonomie tregu funksionues si dhe aftësinë për ta përballuar presionin e konkurrencës si dhe forcat e tregut brenda BE-së. Me plotësimin e obligimeve të fundit, Kosova është e gatshme t’i bashkohet Unionit të shteteve evropiane dhe kontributi i saj në vazhdimësinë e ngritjes së vlerave të BE-së do të jetë i paçmueshëm.

Me rastin e pranimit dhe aderimit të Republikës së Kosovës në gjirin e shteteve të Bashkimit Evropian, për nder të kryeministrit të Republikës së Kosovës, z. Dardan Molliqaj, u shtrua edhe një darkë solemne e rastit.

Sot, po ashtu, ministri i Punëve të Jashtme, z. Nol Nushi, në një paraqitje spektakolare në Kombet e Bashkuara në New York, pas fitores së Kosovës në padinë ndaj Serbisë dhe pagesës së kësaj të fundit për reparacionet e luftës, prezantoi Konventën e Ndryshimit të Klimës Globale dhe Migrimin e Pinguinëve Perandorë. Konventa pritet të nënshkruhet nga të gjitha shtetet anëtare të Kombeve të Bashkuara, unanimisht.

Nga lajmet vendore veçojmë:

Ministrja e Ekonomisë dhe Tregtisë, znj. Natyra Kuçi, së bashku me ministren e Shëndetësisë, Teutë Rrusta, sot solemnisht përuruan mega-fabrikën për prodhimin e vaksinave COVID-21. Pas zbulimit dhe patentimit të vaksinës së zbuluar nga laboratorët e kompanisë farmaceutike “Kamishizer” kundër COVID-21, Kosova tashmë është e gatshme që fillimisht tregun evropian e më pas edhe atë botëror ta furnizojë dhe ta saturojë me vaksinat aq të kërkuara.

Me këtë rast, në një prononcim të rastit, ministri i Financave, z. Qendron Kastrati, theksoi se në vazhdën e transparencës ndaj të gjitha palëve dhe shteteve të cilat kontraktuan për blerjen e vaksinave kundër COVID-21 nga “Kamishizer”, kjo kompani prestigjioze farmaceutike nga Republika e Kosovës do të gjenerojë një profit prej 1.7 miliardë eurosh në gjashtëmujorin e parë.

Shkencëtari, njëherësh edhe aksionari kryesor i fabrikës “Kamishizer”, z. Bekim Haxhiu, pritet që javën tjetër të dekorohet me çmimin “Nobel” për të arriturat në shkencë dhe teknologji. Ai me këtë rast deklaroi se shumën e parave të fituara të çmimit do t’ua dhurojë vendeve të treta, për blerjen e vaksinës kundër COVID-21.

Nga Presidenca e Republikës së Kosovës njoftohemi se presidenti i Republikës së Kosovës, Shkëlqesia e Tij Enver Hoxhaj, është ftuar të marrë pjesë në samitin e radhës së vendeve të NATO-s, i cili do të mbahet në zyrat qendrore të kësaj organizate veri-atlantike në Bruksel, më 14 qershor 2021.

Kosova si vend anëtar në këtë samit do ta prezantojë shtrirjen e sistemeve më të reja raketore me rreze të mesme veprimi – të përuruara me rastin e ditëlindjes së mbretit historik dhe të papërsëritshëm arbëror "Scanderbeg" – si dhe sistemin e raketave balistike "Liria ka Emër", me rreze të gjata veprimi. Shkëlqesia e Tij, z. Enver Hoxhaj, me këtë rast deklaroi se është nder i veçantë për të si president, por edhe për Kosovën si shtet, që të jenë pararojë e mbrojtjes së vlerave euro-atlantike. Po qe se ndonjëherë ndonjë armiku të jashtëm potencial do t’i shkonte mendja t’i nëpërkëmbte ato vlera, "veprimi i Republikës së Kosovës dhe i imi si komandant suprem i forcave mbrojtëse të Kosovës do të ishte një përgjigje e menjëhershme dhe ndëshkuese ndaj cilitdo armik", theksoi Hoxhaj.

Nga lajmet të cilat kanë arritur prej Administratës së Kuvendit të Kosovës njoftohemi se kryetari i Kuvendit, z. Dukagjin Gorani, do ta ftojë seancën e radhës së Kuvendit të Kosovës, ku në bazë të ngritjes së mocionit nga anëtarët e opozitës së bashkuar të Vetëvendosjes dhe Listës Guxo, do të ftohet në interpelancë ministrja e Shëndetësisë, znj. Teuta Rrusta, për shkak të, siç u tha, dështimit dhe ngecjes me furnizim të vaksinave kundër COVID-21 për vendet e treta të botës. Mbajtja e seancës parlamentare do të thirret për datën 17 maj 2021.

Vazhdojnë protestat e punëtorëve të pakënaqur me pagat dhe kushtet e punës në kompaninë publike "Kosovodrvo". Kryetari i SPPK-së (Sindikatës së Pavarur të Punëtorëve të Kosovës), z. Frashër Krasniqi, deklaroi se nëse Qeveria e Republikës së Kosovës nuk u përgjigjet pozitivisht kërkesave legjitime të punëtorëve të kompanisë publike "Kosovodrvo" për rritjen e pagave të tyre si dhe përmirësimin e kushteve të tyre të punës, atëherë ajo do të përballet me grevat e përgjithshme të të gjithë punëtorëve të Kosovës, si dhe do të arrihet një bllokadë totale e veprimit të ekonomisë kosovare. Pritet që shumë shpejt të iniciohen bisedimet midis SPPK-së dhe Qeverisë së Kosovës për zgjidhjen dhe tejkalimin e kësaj krize dhe pakënaqësie të shfaqur.

Në lidhje me ketë situatë dhe këtë krizë, ne e kontaktuam edhe Avokatin e Popullit, z. Dastid Pallaska, i cili deklaroi se shkelja e të drejtave të punëtorëve të kompanisë "Kosovodrvo" paraqet një shkelje flagrante të të drejtave të punëtorit dhe si e tillë ligjërisht është kollaj e dëshmueshme. Presim veprim të menjëhershëm të Qeverisë për sanimin dhe tejkalimin e këtij problemi, si dhe rimbursimin e punëtorëve në mënyrë retroaktive, e po ashtu edhe përmirësimin e menjëhershëm dhe adekuat të kushteve të punës për punonjësit e kompanisë "Kosovodrvo".

Aktivistët e Partisë së Gjelbër kanë në krye z. Vehbi Kajtazin, i cili u deklarua nga vila e tij e drunjtë në Prevallë me akuza ndaj kompanisë "Kosovodrvo" se po shkatërron pyjet e Kosovës, duke i prerë ato në mënyrë të pakontrollueshme. Shpyllëzimi i pyjeve të Kosovës ka arritur pikën kritike, sipas Kajtazit, dhe do të duhet marrë të gjitha masat ndëshkuese dhe preventive për ruajtjen e pyjeve të Kosovës.

Jua sjellim edhe një lajm nga zhvillimet në botën e teknologjisë të “Kosova Silicone Valley”. Revista e shquar botërore “FORBES”, në njërin nga kryetitujt e vet të radhës, shkruan se magnati i procesorëve të kompjuterëve kuantikë "Zaffa Computers" do t’i prijë listës së më të pasurve të botës, pas ndarjes së Bill Gatesit nga gruaja e tij Linda, si dhe pas pagesave të shkurorëzimit me këtë rast. "Zaffa Computers" do t’i prijë listës së më të pasurve të botës, pasuar nga Jeff Bezos i “Amazonit” dhe Elon Musk i “Space X”.

Ministri i Arsimit, Teknologjisë dhe Shkencës, Abelardë Tahiri, sotë priti homologunë e tij nga Mbretëria e Bashkuarë, Rowan Atkisnonë, dhe bashkarishtë vendosënë se do të punojnë për përafriminë e planprogrameve shkollore dhe ngritjen e cilësisë së arsimitë në Kosovë, që do të pasqyrohetë edhe në suksesinë e testimitë të radhës së PISA-s.

Prej lajmeve nga kultura veçojmë:

Pasi vitin e kaluar u anulua Eurovisioni për shkak të pandemisë, sivjet ai do të mbahet në Rotterdam të Holandës, aty ku do të duhej të mbahej Eurovisioni i vitit 2020 para se të anulohej. Gjysmëfinalet do të mbahen më 18 dhe 20 maj, ndërsa finalja e madhe do të mbahet më 22 maj 2021.

Siç e dimë, sivjet, Republikën e Kosovës në edicionin e Eurovisionit 2021 do ta përfaqësojë Ramush Haradinaj, me këngën "Kah po shkon moj Zanë."

Në pyetjen e opozitës së tanishme joformale dhe asaj formale se pse ekselenca juaj – ambasador i Republikës së Kosovës në Facebook – po bon hajgare, unë përgjigjem: Ju keni filluar të parët!