“Na deshtëm me e bâ, por ata s’na lanë”

Esenca mbetet kjo: dëshirat e asnjërit nga ju nuk kanë lidhje me nevojat dhe kërkesat e qytetarëve. Nuk është se keni vepruar ndryshe edhe në të kaluarën, por sidomos këta 11 muaj punuat vetëm për qejfin dhe interesin tuaj, dhe pesë pará nuk i dhatë nëse gjatë veprimeve tuaja shkelnit ligje e Kushtetutën. Një gjë e kishit të sigurt: arsyetimin si për të mirë, ashtu edhe për të keq

Nëse deri vonë kemi besuar se në Prishtinë nuk mund të bëhet më keq me trafik, bërllok, ajër të ndotur, etj., etj., fillimi i javës së shkuar na dëshmoi se këtu nuk ka hapësirë për befasi. Se gjërat që mund të na ndodhin do të jenë pjesë e një liste të pafund të “sihariqeve” që na i sjellin kryetarët e komunës, secili në mandat të vetin.

Prishtina përjetoi dhe ende po e jeton grevën e transportuesve publikë dhe privatë. Që nga e hëna e shkuar, Prishtina është bërë me komunikacion edhe më kaotik. Vetëm me ndalimin e qarkullimit të autobusëve urbanë e ndërurbanë mundëm të kuptonim se sa shumë njerëz i shfrytëzojnë shërbimet e transportuesve. Atë që nuk e kuptuam është se sa shumë njerëz në fakt qarkullojnë me autobusë pa paguar biletën, për shkak se falë vendimeve elektorale të Komunës së Prishtinës, listës së gjatë të të liruarve nga obligimi i pagesës së biletës, më 1 tetor 2025 iu shtuan edhe stafi shëndetësor dhe stafi administrativ, teknik dhe mbështetës i të gjitha institucioneve shëndetësore të kryeqytetit; stafi mësimor dhe stafi administrativ, teknik dhe mbështetës i të gjitha institucioneve arsimore të kryeqytetit, përfshirë institucionet parashkollore; të gjithë punonjësit e administratës së kryeqytetit të të gjitha niveleve, përfshirë institucionet varëse të kryeqytetit; të gjithë nxënësit e shkollave të mesme të kryeqytetit; të gjithë studentët e kryeqytetit, nën moton “Transformimi i Transportit Urban vazhdon!”.

Pra, vendimi populist në mes të zgjedhjeve, që ka pasoja të mëdha financiare, u miratua nga Rama dhe ekipi i tij, edhe pse ai e ka ditur, e ne jo (sepse kjo na u bë publike vetëm këtë javë), se transportuesit privatë nuk ishin paguar nga maji i sivjetmë. Gjashtë muaj pra. Shumë, edhe për ata që kanë shumë para.

* * *

Rama doli në konferenca për shtyp disa herë gjatë javës. Ndër shumë gjëra që foli e tha edhe këtë: “Bëhet fjalë për funksione elementare të kryeqytetit tonë, për mirëqenien e fëmijëve tanë, të moshuarve dhe familjeve tona. Për mbi një vit kemi kërkuar alokimin e buxhetit që i takon kryeqytetit. Asnjë kërkesë nuk është trajtuar, buxheti është bllokuar për çështje krejtësisht politike. 35 milionë euro, prej të cilave 25 milionë euro janë të hyra vetjake dhe 10 milionë të grantit qeveritar janë bllokuar nga Ministria e Financave në kundërshtim me ligjin. Për këtë arsye kam lajmëruar që kemi dorëzuar kallëzim penal ndaj ministrit në detyrë Hekuran Murati dhe zyrtarëve përgjegjës për shkelje të ligjit. Jemi drejtuar edhe kryeministrit në detyrë dhe presidentes dhe kemi kërkuar shqyrtim urgjent edhe nga Gjykata Kushtetuese... Nuk kam besuar kurrë që qytetarët e këtij vendi do të viheshin në rrezik nga interesa zgjedhore...”.

Pas konferencës së parë, transportuesit u mblodhën para komunës. Protestuan. Doli Rama dhe të gjithë fajin e hodhi në adresë të Qeverisë. I animoi që të shkonin në drejtim të ndërtesës së Qeverisë, aty në komshillëk, dhe të protestonin. Eci bashkë me ta, por Murati i pranoi vetëm transportuesit. Pas disa orë bisedash, transportuesit vendosën që të nesërmen të protestonin para ndërtesës së Komunës. Lirimi i mjeteve “vetjake” varej nga Komuna e jo nga Qeveria. Procedurë e përcaktuar me ligj, që nuk lë hapësirë për dyshime. Pra, nëse një komunë vonohet për ta kaluar buxhetin (kjo në Prishtinë ka ndodhur dy muaj më vonë vjet), Ministria e bën një version të sajin të buxhetit, i cili mbetet si opsion deri në çastin kur Kuvendi i Kosovës e miraton buxhetin e Komunës përkatëse. Buxheti i Prishtinës nuk ka kaluar në Kuvend të Kosovës, prandaj është në fuqi versioni i përgatitur nga MF.

Grantet qeveritare të pashfrytëzuara kthehen në buxhet, ndërkohë që mjetet vetjake, që mblidhen nga tatimet e të ngjashme, janë të Komunës dhe me to duhet të disponojë lirshëm, por me miratimin e Kuvendit Komunal. Ky miratim erdhi tek para dy ditësh. Do të thotë 11 muaj më vonë.

* * *

“Qiti paret, ministër. Qiti menjëherë!”

Ky qe turbo popullizmi i Ramës para protestuesve, duke e vazhduar telenovelën për mjetet, që, sipas tij, Murati i mban jashtëligjshëm në thesar. Duke e përsëritur të famshmen “bllokuesit” – se ja, “na deshtëm me bâ, po këta s’po na lanë”. E faktet, sado që këshilltarët e Ramës i kundërshtojnë, janë si vijon:

1. Rama vetë e vonoi miratimin e buxhetit për 2025-tën, për shkak se e prishi koalicionin me PDK-në dhe mbeti pa shumicë. Po të mos kalonte buxheti, Komuna shkonte në zgjedhje. Votat vendimtare ishin të dy këshilltarëve të dalë nga VV-ja.

2. Për 11 muaj nuk e mblodhi Kuvendin Komunal për ta kërkuar alokimin e mjeteve vetjake. Fakt është se i thirri tri seanca të jashtëzakonshme, së cilës nuk iu përgjigj opozita, porse nuk shkoi përtej këtyre tentimeve dhe nisjes së fajësimit të Qeverisë për bllokim.

3. Gjithë kohën i përmendte 35 milionë të “mjeteve vetjake”, në fund dolën 28. Konfuzion total për mjetet e mbledhura nga Komuna sipas viteve, që ai që e udhëheq qytetin duhet t’i dijë përmendsh.

4. Nuk i ka paguar transportuesit privatë nga maji i sivjetmë. Kushedi edhe çka tjetër nuk ka paguar. Kushedi edhe sa para kanë shkuar nëpërmjet përmbaruesve. Për këto nuk tregon në konferencat për shtyp e as në postimet e sponsorizuara në FB.

5. Buxheti i 2026-s nuk është votuar, për shkak se nuk i ka pasur votat, sepse VV-ja e mbase edhe PDK-ja do të votonin kundër. Në një analogji me procedurat e përjetuara në dhjetë muajt e fundit, situata është identike sa i përket raportit të numrave.

Sipas Ramës, në Prishtinë, bllokuesit janë VV-ja që nuk e votuan shpërndarjen e mjeteve vetjake e as buxhetin, ndërkohë që LDK-ja nuk i kishte votat. Në nivelin qendror, VV-ja nuk i kishte votat, dhe LDK-ja votoi kundër. A i bie kjo që LDK-ja është bllokuese?

Përderisa e replikon sjelljen e njëllojtë, nuk ke as bazë e as argumente ta akuzosh atë tjetrin për çfarëdo. Sepse jeni njësoj. Bllokues për qejfe, inate e interesa, ndërkohë që pasojat po i pësojmë ne qytetarët. Në të gjitha sferat.

6. I gjithë ky cirk, “qiti paret”, është në shërbim të zgjedhjeve qendrore. Kallëzimet penale e shkuarjet në Kushtetuese me ankesa krejt dekonspirohen dhe çmontohen me mbledhjen urgjente të Kuvendit Komunal për ta kaluar alokimin e mjeteve vetjake. E tash të shohim se cilat do të jenë veprimet e radhës. Cila do të jetë bllokada e radhës?

Përndryshe, tash kemi përshkallëzuar në fazën e dytë të akuzave të ndërsjella për bllokime. Absolutisht të gërditshëm të dy taborët: LDK-ja, më e zëshmja kur përmendet bllokada dhe kur kërcasin ankesat në stilin “na deshtëm, por ata s’na lanë” vazhdon ta ushqejë këtë narrativë për çdo ditë, nëpërmjet Abdixhikut, Ramës apo Bajramit. E kështu do ta kemi deri në zgjedhje... gajret edhe katër javë.

Hiç mbrapa s’po mbetet VV-ja, duke i akuzuar krejt se “na deshtëm, po ata s’na lanë”, duke nisur nga zgjedhja e kryeparlamentarit, për të cilin kurrë nuk i patën numrat; për zgjedhjen e Qeverisë, për të cilën kurrë nuk i patën numrat, dhe në fund me lojën rreth votimit të buxhetit pa themelimin e komisioneve parlamentare.

Esenca mbetet kjo: dëshirat e asnjërit nga ju nuk kanë lidhje me nevojat dhe kërkesat e qytetarëve. Nuk është se keni vepruar ndryshe edhe në të kaluarën, por sidomos këta 11 muaj punuat vetëm për qejfin dhe interesin tuaj, dhe pesë pará nuk i dhatë nëse gjatë veprimeve tuaja shkelnit ligje e Kushtetutën. Një gjë e kishit të sigurt: formulën e gatshme si për të mirë, ashtu edhe për të keq: “na deshtëm me bâ, por ata s’na lanë”

[email protected]