Organizata kërkimore daneze “Digital Responsibility” ka akuzuar Snapchatin se lejon një “numër shumë të madh” tregtarësh droge të operojnë hapur në platformën sociale, duke e bërë më të lehtë për fëmijët blerjen e llojeve të ndryshme të drogës, përfshirë kokainë dhe opioide.
Sipas hulumtimit të kësaj organizate, e cila promovon zhvillimin e përgjegjshëm digjital, është gjetur dëshmi se Snapchati nuk moderon gjuhën e lidhur me drogën në emrat e përdoruesve dhe se nuk reagon në mënyrë të mjaftueshme ndaj raportimeve për profile që shesin drogë hapur, raporton The Guardian.
Studiuesit përdorën profile të 13-vjeçarëve dhe gjetën dhjetëra persona që shisnin drogë në Snapchat nën emra përdoruesish me fjalë kyçe si “coke”, “weed” dhe “moli”.
“Si fëmijë apo i ri, nuk ke pse t’i kërkosh vetë këto profile, Snapchat mund t’i rekomandojë direkt për ty. Kjo është shumë problematike”, ka thënë drejtori ekzekutiv i “Digitalt Ansvar”, Ask Hesby Holm.
Organizata daneze bëri të ditur se kur raportoi 40 nga këto profile te Snapchat, kompania largoi vetëm dhjetë prej tyre, ndërsa kërkesa nuk u pranua për 30 të tjera.
Hulumtimi gjeti gjithashtu se, pavarësisht kritikave të mëparshme, sistemet e rekomandimeve të Snapchatit shpërndanin dhe promovonin profilet e atyre që shesnin drogë ilegale tek përdoruesit – përfshirë fëmijët që më herët nuk kishin treguar interes apo ndërvepruar me profile të tregtarëve të drogës.
Një zëdhënës i Snapchatit ka thënë se kompania “ka tolerancë zero për shitjen e drogës në platformë” dhe se, edhe pse jo të gjitha llogaritë e përmendura në studim ishin raportuar përmes aplikacionit, mbi 75 për qind e tyre ishin mbyllur tashmë nga ekipet e Snapchatit para publikimit të raportit, ndërsa të gjitha llogaritë u “çaktivizuan” pas publikimit të tij.